IMAMELODI Sundowns Ladies izobhekana nezimbangi ezintsha esigabeni samaqoqo eCaf Women’s Champions League.
Amaqembu azodlala kulo mqhudelwano aqhathiwe ngoMsombuluko.
ISundowns izibekisele indawo kwiChampions League okwesithathu kulandelana ngokunqoba owokuhlunga weCosafa eThekwini ngenyanga edlule. Iguqise iDouble Action Ladies yaseBotswana ngo 2-0 kowamanqamu.
I-AS FAR yaseMorocco yilona kuphela elinye iqembu elizobe lidlala lo mqhudelwano okwesithathu selokhu waqala ngo-2021. Izobe ivikela indebe ngemuva kokuyihlwitha kwiSundowns nyakenye.
Elinye iqembu elibuyile elake ladlala kuwona yi-AS Mande yaseMali kanti lawa amanye amaqembu amahlanu azobe eqala ukudlala kuwona.
Kulo nyaka uzoba se-Ivory Coast kusukela ngoNovemba 5 kuya kuNovemba 19.
ISundowns izoqala lo mqhudelwano kuGroup A lapho izobhekana neqembu lasekhaya, i-Athletico FC d’Abidjan, iSC Casablanca yaseMorocco ne-JKT Queens yaseTanzania.
I-AS FAR izodlala ne-Ampem Darkoa yaseGhana, iHuracanes yase-Equatorial Guinea ne-AS Mande ku-Group B.
Amaqembu amabili azoqhwakela eqoqweni ngalinye azodlulela kowandulela owamanqamu.
Iqembu elizonqoba lizothola u-400 000 USD (olinganiselwa ku-R7.75 million), okuyimali elinganayo neyanyakenye. Iqembu elizodla umhlanganiso kwiCaf Champions League yabesilisa lizohlomula ngo-4 million USD (olinganiselwa ku-R77.5 million).
Khonamanjalo, iSundowns Ladies iqhubekile nokufaka ingcindezi kwi-University of Western Cape ngokuqumba phansi iCity Lads Ladies ngo 6-0 koweHollywoodbets Super League ngempelasonto.
UBoitumelo Rabale uhlohle amagoli amathathu kwathi amanye ashaywa nguMiche Minnies, Lebogang Ramalepe noRefilwe Tholakele.
ISundowns Ladies isendaweni yesibili ngamaphuzu angu-54 emidlalweni engu-21. I-UWC isahlezi esicongweni ngamaphuzu angu-63 emidlalweni engu-23.
“Bese kudlule isikhathi eside singadlali ngakho kulethe umuzwa omuhle kakhulu ukubuyela emdlalweni. Umdlalo usivumele ukuthi sisebenzise konke ebesikufunda ngesikhathi sizilolonga emasontweni ambalwa edlule,” kusho uTholakele kwi-website yeSundowns.
“Sidlale ngokukhululeka futhi sakwazi ukuthola inqwaba yamagoli, okuyinto esijabulisile. Kubalulekile ukuthi siqhubeke nalo mgqigqo njengoba silungiselela imidlalo eminingi okufanele siyidlale emasontweni azayo.”
ISundowns Ladies izobuyela enkundleni namuhla uma isidudulana neDurban Ladies eKing Zwelithini Stadium ngo-1 ntambama. I-UWC, Royal AM, TS Galaxy Queens, Tuks Ladies, UJ Ladies, Durban Ladies, TUT Ladies neCopperbelt Ladies abazange badlale ngempelasonto, iningi labo linabadlali abaseqenjini leBanyana Banyana eliyibambe kwiCosafa Women’s Championship.
Eminye imiphumela yeHollywoodbets Super League:
JVW 1-0 Coal City Wizards; Thunder Ladies 2-0 First Touch Academy; Ma Indies 2-2 Richmond United.