ASEQHATHIWE amaqembu abaculi azobe eqhudelana kwiJammin 2 Soccer Celebrity Game e-University of Johannesburg, eGoli ngoJulayi 23. Ngokusho komunye wabagqugquzeli balo mqhudelwano webhola lezinyawo, uBig Zulu, amaqembu azobe edlana imilala, uMaskandi uzobhekana neHip Hop kube sekuba iGospel izodlala ne Gqom.
"NgoLwesibili yilanga elikhulu le-draw ezobe ivezwa bukhoma ekhasini likaFacebook likaDJ Tira nelikaKhuzani Mpungose. Iyolala ibonene. Ngomhla ka-23 umdlalo e-UJ. Nikhumbule lolu suku," kuchaza uBig Zulu ozobe ehola iqembu lomrepha.
NoKhuzani umfakazele, wathi naye iyolala ibonene.
Nyakenye kwakuqhathwe amaqembu amane, okungelikamaskandi elaliholwa wuKhuzani, amapiano ayeholwa nguKabza De Small, i-hip hop eyayiholwa wuBig Zulu nele-gqom' elaliholwa nguDJ Tira.
Umdlalo wokuqala wawuphakathi kweqembu le-hip hop nelegqom', kwawina ele-hip hop ngamathathu kwamabili. Umdlalo wesibili wabaphakathi kwelikamaskandi nelamapiano, kwahamba phambili elikamaskandi kumaphenathi emuva kokubambana ngo1-1. Emzuliswaneni wamanqamu iqembu likamaskandi lakhala lemuka nesamba sikaR100 000 emuva kokuqumba phansi iqembu le-hip hop ngelilodwa eqandeni. Omrepha bathotshwa izinhliziyo ngoR50 000. Lamaqembu ahlulwa emzuliswaneni owandulela owamanqamu, iqembu ngalinye laphiwa uR25 000.
Nakulokhu kuzobe kuncintisana amaqembu ezinhlobo ezine zomculo, okuyi-hip hop, maskandi, gospel negqom'. Yize kungakazeki ukuthi umculo wokholo uzobe uholwa ngubani kodwa owe-hip hop usaholwa wuBig Zulu, okamaskandi nguKhuzani kanti owegqom' nguDJ Tira.
Nyakenye kwaqopheka umlando ngesikhathi kubonakala abaculi ebebaziwa ngokuthi bayinkukhu nempaka, uCassper Nyovest no-AKA, bencokolisana. Akekho owazi ukuthi u-AKA usedlala okokugcina kule midlalo.
Nakulo nyaka, lolu chungechunge lwemidlalo yebhola losaziwayo, lubhekwe ngamehlo abomvu.