USIHLALO we-Ikhambi Football Academy engompetha beSafa uMkhanyakude Hollywoodbets Regional League, uMntanenkosi “Sgoga” Mkhwanazi, uthi ezakhe ziyakwazi ezikulindele kumaPlay-Off esifundazwe azoba seMgungundlovu.
Ikhambi Academy edle umhlanganiso kuma-play-off esifunda iSafa uMkhanyakude abedlalelwa KwaMsane Sports Ground, eMtubatuba, ngeSonto, yiyona esizomela uMkhanyakude emidlalweni yokuhlunga yesifundazwe.
Imidlalo yokuhlunga yeSafa KZN Hollywoodbets Regional League kumele ikhiphe amaqembu amabili azokhushulelwa kwiSafa KZN ABC Motsepe League. Izoba seMgungundlovu ngoMeyi 31 kuya kuJuni 2.
“Kuyintokozo kimina ukuthi sesilithathile igxathu lokuqala eliya phambili njengoba sesiphumelele kuma-play off esifunda, sesibheke kwawesifundazwe.
Ngiyazi ukuthi usemkhulu umsebenzi kodwa sinezinhlelo ezinkulu ngaleli qembu esifuna ukulibona ligcina likhuphukela esigabeni se-ABC Motsepe League.
Ngenkathi silisungula nyakenye inhloso yethu ngesizini yokuqala kwakuwukuthi siyodlala kuma-play off esifundazwe, okuyinto esakwazi ukuyenza safinyelela kuwona noma-ke singaphumelelanga.
Nokho, sifunde lukhulu ngokudlala kuleyo midlalo ngakho-ke siyakwazi esikulindele njengoba sibuyela kuyona kule sizini,” kusho uMkhwanazi.
Leli qembu elizinze eMtubatuba, neliqeqeshwa wuSom Shandu osizana noNotha Nsibande, libunjwe ngabadlali baseMtubatuba namaphethelo nabakwezinye izindawo okubalwa kuzo iSkhaleni, Nquthu, naseBloemfontein, eFree State, imbala.
Uma lingaphumelela ukukhushulelwa esigabeni seMotsepe League liyobuyisa ithemba ngesifunda uMkhanyakude njengamanje esingenalo iqembu elidlala kulesi sigaba kulandela ukudayiswa koMtuba All Stars.
“Siyalethemba ithimba lethu labaqeqeshi kodwa iqiniso wukuthi ama-play offs esifundazwe awalula neze, ngakho sizobatholela abantu (abaqeqeshi) abazobalekelela ngamaqhinga ukuze siphumelele kule midlalo.
Inhloso yethu enkulu kule sizini wukufaka iqembu kwiMotsepe League, nesikholwa wukuthi ukuba khona kweqembu elidlala kulesi sigaba kuzonika abadlali bethu ithuba elihle lokuveza ikhono labo esigabeni esithe thu thu.
NgoMgqibelo sizoba nomhlangano lapho sizohlahla khona indlela ebheke phambili emalungiselelweni ethu emidlalo yokuhlunga,” kusho uMkhwanazi, oncome ukwesekwa abakuthola kwabe-Insika Foundation.
KumaPlay-Off esifundazwe angesizini edlule eSafa Regional League ayeseDundee, amaqembu akhuphuka kwaba yiDlangezwa Hellenic eyadla umhlanganiso neSwayimane United.