Orlando Pirates (0)0
Richards Bay (1) 1
IRICHARDS Bay isunduzele kwalasha iCape Town Spurs ngokwehlula i-Orlando Pirates emdlalweni weDStv Premiership e-Orlando Stadium, eSoweto, ngoMgqibelo ebsuku.
Igoli leBay lishaywe nguSanele Barns esiwombeni sokuqala.
IBay ingene enkundleni idinga amaphuzu amathathu okubalekela ingozi yokudliwa yizembe ngasemsileni we-log yePremiership kwazise kade isendaweni ka-15. Ngakolunye uhlangothi eZimnyama bezilwela ukwenyukela endaweni yesibili eziyibanga neStellenbosch ethole isibhaxu kwiMoroka Swallows ngoMgqibelo emini. Inhloso yazo wukuqeda endaweni yesibili, zizibekisele indawo kwiCaf Champions League ngesizini ezayo. Ukwehlulwa yiBay kuyishiye iPirates isele ngephuzu kwiStellies esendaweni yesibili ngamaphuzu angu-50.
Ukuwina kweBay esiqoqe amaphuzu angu-27, kuqinisekise ukugawulwa yizembe kweCape Town Spurs esemsileni we-log ngenxa yokuthi ngokwezibalo ngeke isawafica ngamaphuzu amaqembu angaphezu kwayo phezu kokuba isasalelwe yimidlalo emibili. Iyibambe ekugcineni ngamaphuzu angu-19 emuva kwemidlalo engu-28. ISpurs inyukele kwiPremiership ekuqaleni kwesizini ngemuva kokuwina imidlalo yama-Play Offs, yashovela phansi iMaritzburg United. Isizoyibamba kwiMotsepe Foundation Championship ngesizini ka-2024/2025.
Enkundleni, iPirates iqale umdlalo ngegiya eliphezulu, iwuphethe umdlalo kodwa ibihluleka uma isifike phambili. Ngokuhamba kwesikhathi iBay ingenile emdlalweni, yaqala ukushoshela phambili kodwa ihluleka ukwakha amathuba acacile okushaya amagoli. Ukudlala ngokungesabi kweBay kuthele izithelo ngomzuzu ka-36 ngesikhathi uBarnes eyishayela igoli emuva kwokuthola ibhola ebeligotshwe nguSomila Ntsundwana kwesokunxele, lashayisa ngumdlali wePirates, lawela kuyena. Ngaphambi kokuphela kwesiwombe sokuqala, iPirates iwatholile amathuba okushaya elokulinganisa kodwa yahluleka ukuwasebenzisa.
Esiwombeni sesibili, iPirates ibuye ngomfutho yahlasela iphindelela. Nokho besingakelapheki isimo sayo sokuhluleka ukusebenzisa amathuba uma isifike phambili. Nokho iBay ibilokhu iqhubekile nokuba yingozi uma ihlasela, isebenzisa izikhala ebezishiywa yiPirates emuva njengoba ibifuna igoli lokulinganisa. Ngomzuzu ka-82 unozinti weBay, uSalim Magoola utakule ezakhe evimba ibhola likaPatrick Maswanganyi sekuvalwe amehlo.