UTHEMBISA ukuvikela isicoco seNkandla May Horse Racing, uSphamandla Gama ongumgibeli wehhashi lodumo uNxakanxaka.
Lo mjaho wamahhasi waminyaka yonke, uqala ngo-9 ekuseni ngoMgqibelo oNgwengweni, eNkandla.
IMeya kaMasipala waseNkandla, uMbhekiseni Biyela utshele Isolezwe ukuthi imali izobe ikhiwa ngamafosholo njengoba ingu-R250 000 seyiyonke ebekelwe imiklomelo.
Ihhashi elizoshaya intambo emjahweni omkhulu (stage 1) lizoklonyeliswa ngo-R30 000. Isibili u-R20 000 bese isithathu kube u-R10 000.
Ku-stage 1kukhokhwa kuze kuyofika emjahweni wesihlanu. Omunye umjaho ozobe ubhekwe kakhulu ngowamantombazane.
Lo mjaho okungowesithupha, ikhokhela u-R10 400. Kuzolandela oka-stage 2 nawo okhokha kuze kuyoshaya kowesihlanu.
Nyakenye iNkandla May yanqotshwa wuye uNxakanxaka egitshelwe ujokhi wakhe, uSphamandla.
Leli hhashi selizakhele udumo ngokuhlale likhonya emijahweni yomtelebhelo, okubalwa iDundee July, King Cetshwayo, Harry Gwala Summer Cup neminye.
Ngo-2002 leli hhashi likaMdubane Gama layinqoba yonke le mijaho. USiphamandla uthe baya eNkandla bephila saka.
"Angeke sinoNxakanxaka sivume ukuphucwa lesi sicoco, ngesethu. Kuhle ngoba nabanye ojokhi bayazi ukuthi akudlalelwa kithina. Empeleni sihlela ukuphinda esango-2022. Izofika iDundee July sesinqobe yonke into," kubeka uSiphamandla.
Nyakenye uNxakanxaka waba neshwa eshayiswa ngelinye ihhashi emzileni womjaho omkhulu. Lokhu kwaholela ekutheni angenzi kahle kweyalandela.
UGama uthe ngemali esinqotshwe yileli hhashi sewakhe isithabathaba somuzi e-Utrecht ngaphansi kwesiFunda, AmaJuba. Ubuye wathenga nemoto yohlobo lweFortuner nezinkomo ezingu-21.
Imeya uBiyela ithe amalungeselelo ahamba kahle kanti ojokhi baseNkandla babecele umasipala ukuthi ubaxhase ngenkunzi yehhashi ezobandisela amahhashi agijima lo mjaho.
“Abafike ngobuningi babo abalandeli bomjaho, sizobe siyethula ngokusemthethweni le nkunzi yehhashi. Kuyajabulisa ukubona likhula isasasa lalo mjaho," kusho uBiyela.