LUNGILE MAJOKA
BEKUWUMCIMBI kaGerda Steyn kwabesifazane kwiComrades Marathon, ayihole kusukwa eCity Hall, eThekwini waze wayongena eScottville Racecourse, eMgungundlovu.
Le ntokazi yakuleli iwaphule wonke amarekhodi ahambisana nemihlomulo abebekiwe kulo mjaho. Unqobe umjaho ngelisha lika-5:49:46, ephula ayelibeke ngo-2019 kukhushukwa lika-5:58:53.
Endaweni yesibili kungene u-Alexander Morozova waseRussia owanqoba ngo-2022, indawo yesithathu yathathwa umgijimi wase-USA, uCourtney Olsen.
Ngokunqoba umjaho uhlomule ngo-R825 000 bese kuba u-R500 000 ngokuphula irekhodi.
Unqobe umjaho wakhe wesithathu weComrades njengoba akwenza ngo-2019 nango-2023.
UGerda (34) osebizwa ngeNdlovukazi yeComrades kwabesifazane ubelokhu emamatheka kusukwa phansi eThekwini. Endleleni ubebonakala exhumana nezibukeli, abuye aphisane ngamabhodlela amanzi abekade ewaphuza, obekubonakala bekujabulela abebewathola.
Nangesikhathi engena eScottville, ubengakhombisi ukuxakeka njengoba ebemamatheka. Indlela ebibonakala engakhathele ngakhona, uthe engayigqashula intambo, ubesanomfutho wokujika abuyele emuva, ebingenelela izibukeli.