NGEMUVA kwempelasonto yomqhudelwano womkhumulajezi, iMathemba Super Cup obudlalwa okokuqala ngempelasonto edlule, imidlalo yeSafa KwaZulu-Natal ABC Motsepe League ikhuza ibuya ngoMgqibelo, ngemidlalo emqoka yamaqembu asembangweni wesicoco kuStream A.
Ngeledlule kwethulwe umqhudelwano, iMathemba Super Cup, oxhaswe ngabenkampani iMathembamahle Enterprise (Pty) Ltd ngesamba sika-R256 000. Uqale ukudlalwa ngempelasonto edlule ngamaqembu eKZN Motsepe League kodwa eminye imidlalo yawo yabhuntsha ngenxa yemvula, yabuyela enkundleni ngoLwesibili.
Nakuba kule mpelasonto lo mqhudelwano bekumele usongwe kodwa ihhovisi leSafa KwaZulu-Natal linqume ukuyihlehlisela impelasonto ezayo imidlalo yawo njengoba usuzosongwa ngempelasonto kaMashi 29, ezinkundleni ezisazomenyezelwa.
Iqembu elizodla umhlanganiso lizokhala lemuke nendebe nesheke lika-R100 000. Elizolala isibili lizogoduka no-R50 000.
Njengoba amaqembu eSafa KZN Motsepe League esesalelwe yimidlalo emine kuphela ukusonga isizini, ukubuyela kwemidlalo yeligi kule mpelasonto kwenza ibhekwe ngabomvu imidlalo ethinta amaqembu asembangweni wesicoco kuStream A, okuyiMidlands Wanderers, iNjampela FC noMvoti FC.
UMkhambathi FC ususheshe wayiphetha imbenge kuStream B yize kusasele imidlalo emine kusongwe isizini. Wonke amehlo asebheke okuzokwenzeka kuStream A okuyilapho sezidlana khona imilala.
Iqembu elizogcina lidle umhlanganiso kuStream A, lizobhekana noMkhambathi kowokuhlunga elizomela iKwaZulu-Natal kumaPlay-Offs kazwelonke e-ABC Motsepe League okuzabalazela ukukhushulelwa kwiMotsepe Foundation Championship.
Imidlalo ebhekwe kakhulu ngoMgqibelo, ngoweNjampela FC neSummerfield Dynamos ozoba KwaMsane Stadium, eMtubatuba ngo-3 ntambama.
NgoweMidlands Wanderers neHellenic, eHarry Gwala Stadium, eMgungundlovu, kube ngowoMvoti FC neMkhumbane Classic eKing Edward Park, eGreytown.
Imidlalo yeSafa KwaZulu-Natal ABC Motsepe League:
Stream A:
NgoMgqibelo - Ngo-3pm
Asande FC v Muzi King Masters (Buffelsdale Soccer Field); Njampela FC v Summerfield Dynamos (KwaMsane Stadium); Midlands Wanderers (Harry Gwala Stadium); Ulundi United v Durban Pioneers (Melmoth Stadium); Umvoti FC v Mkhumbane Classic (King Edward Park)
Stream B:
Ngo-12pm
Mkhambathi FC v Junior Eleven (Harry Gwala Stadium);
Ngo-3pm
Chess FC v Ethekwini Coastal (Osizweni Stadium); Msinga United v Ditlou FC (Mzisho Stadium); Umshwanti v Newcastle All Stars (Wartburg Stadium)