UJABULE wabuya nganeno umqeqeshi weMamelodi Sundowns uPitso Mosimane ogcizelele ukuthi ezakhe akumele zigxile ekushayeni iChiefs ukuze zizowina iligi ngenkathi ngemuva komdlalo bethela Amazulu ngehlazo lika 5-0 emdlalweni weTelkom Knockout obuseLucas Moripe Stadium izolo.
UPitso uthe abadlali bakhe akumele bacange ngokuziphindisela kwiKaizer Chiefs abazobhekana nayo kwiligi ngoMgqibelo kodwa abagxilise imiqondo emdlalweni weHighlands Park njengoba benemidlalo emibili esesandleni kwi-Absa Premiership.
“Akumele sizikhathaze ngeChiefs, asigxile emdlalweni weHighlands Park kuqala. Sisele kwiligi ngemidlalo emibili, umdlalo weHighlands Park uzoba yinkinga kakhulu. Ukuze siwine iligi, akumele sihlule iChiefs, akumele sithathwe yinhliziyo sicabange ngeChiefs. Kumele siziphathe ngendlela efanele. Akumele siwine umdlalo weChiefs ukuze siwine isicoco seligi. Ngizobatshela abadlali bami ukuthi bagxilise imiqondo emdlalweni weHighlands ukudlula oweChiefs,” kuchaza uPitso.
Amagoli eDowns ashaywe u-Ali Meza, uMario Booysen okube umkhonto ogwaze ekhaya, uGaston Sirino oshaye amabili kanye noMauricio Affonso. Yize iSundowns iwine ngembudlu yamagoli, uPitso ubebukeka enganeme emuva komdlalo njengoba eveze ukuthi ubefisa ezakhe zishaye amanye amagoli.
Inkulumo kaPitso kungenzeka ingahlali kahle kubalandeli kanye nomqeqeshi weChiefs u-Ernst Middendorp kwazise uPitso uke wakhala emasontweni adlule ethi iChiefs ihlezi ivunwa izinqumo zikanompempe.
Lokhu kudale ukuthi laba baqeqeshi baqophisane ngamazwi esithangamini sabezindaba ngaphambi kokuba lamaqembu atholane emdlalweni weShell Helix Ultra Cup ngo-Okthoba 12, okuwumdlalo owanqotshwa yiChiefs ngo 4-2.
Izolo abalandeli beDowns bakhiphele ulaka lwabo kuMiddendorp obezobukela umdlalo, njengoba iDowns izodlala neChiefs ngo-Okthoba 27 eLoftus Versfeld. Emuva kwegoli lesine uMiddendorp usukumile wahamba, okudale ukuthi abalandeli bamhhewule.
Ngokuwina lomdlalo, iDowns izibekisele indawo kuma-quarterfinals eTelkom Knockout, njengoba ijoyine iMaritzburg United, Golden Arrows, Kaizer Chiefs, Orlando Pirates, Supersport United neHighlands Park.
Uhlelo lokuhlungwa kwamaqembu azotholana kuma-quartefinals luzokwenziwa ngoLwesibili emuva komdlalo wokugcina weLast 16 ophakathi kweBloemfontein Celtic neChippa United ozobe useNelson Mandela Bay Stadium, eBhayi, ngo 07:30 ebusuku.