UZIFIKELE qathatha endaweni yesigameko uTony Forbes onguyise womrepha u-AKA lapho okuphelele khona indodana yakhe, edutshulwe eduze kwaseWish on Florida, eThekwini ngoLwesihlanu ebusuku.
Uyise ka-AKA ufike kule ndawo ehamba nabanye okuvele ukuthi ngamalungu omndeni wakhe, bangena ngaphakathi endaweni yobumnandi. Kuvele ukuthi ube nengxoxo ende nomnikazi wendawo iWish on Florida.
Kuvele ukuthi abomndeni bebezobuka isehlo ngokuqopha kwamakhamera ale ndawo yokucima ukoma. Okuqaphelekile wukuthi indawo inezinxakanxaka zamakhamera abheke ezindaweni ezehlukene emnyango wayo. Ngaphesheya komgwaqo kukhona isiteshi samaphoyisa omkhandlu weTheku esibhekene nendawo yesehlo.
Abomndeni bahlalile ngaphakathi akwaziwa ukuthi yini ebidingidwa kulo mhlangano omude. Emuva kwalokho uyise kamufi uphumile nethimba lakhe babeka izimbali lapho okuphelele khona umufi.
Baqede ukubeka izimbali bangena emotweni emnyama yohlobo oluphambili bashaya bachitha. Ngaphambi kokuthi baphume emhlanganweni kuphume umyalelo wokuthi abezindaba babadedele bangababuzi lutho, badonswa ngendlebe. Umyalelo ukhishwe ngesinye sezikhulu zenxanxathela yezitolo.
Abanye abebesethimbeni babonakale beyizinsizwa ezisencane nazo ebezibonakala nje ukuthi azikakholwa ngokwenzekile.
Uyise kamufi namanye amalungu omndeni bebebonakala nje ukuthi basashaqekile futhi badangele ngokwenzekile ngoba bebengandile ngakuxoxa bebethule nje beqonda lapho abaya khona.
Umnikazi wendawo ubengabonwa nangokhalo izolo njengoba abezindaba bebenkanise phambi komnyango wendawo yakhe.