Omunye wabanikazi beWish on Florida okuyindawo ebihanjelwe wu-AKA ngaphambi kokudutshulwa kwakhe, uBenny Marverick, uthe isimo kasisihle futhi akakathandi ukuphawula kakhulu ngesigameko.
“Asikakazi ukuthi sizovula nini ngoba ngeke kusisize ukuvula emuva kwale nto ebuhlungu eyenzekile. Isimo sinzima impela ngoba lokhu kusho ukulahlekelwa yinzuzo, kanjalo nokuthi abasebenzi bethu ngeke bahole okuyinto ngebhadi esingeke sikwazi ukuyigwema,” kusho uMarverick.
Uveze ukuthi ngenhlanhla amakhamera afakwe ngaphandle kwale ndawo akwazile ukuqopha okwenzekile.
“Konke okuqoshiwe sikudlulisele emaphoyiseni, sabhala nezitatimende ngenhloso yokusiza mayelana nophenyo,” usho kanje.
Osaziwayo abaningi bazwakalise ukushaqeka nokudumala ngokudlula emhlabeni kuka-AKA, kubona singabala uZakes Bantwini, DJ Black Coffee, Khuzani Mpungose, Boity Thulo nabanye abaningi.
Namaqembu epolitiki abhonge emswaneni, kuwona singabala i-ANC, EFF, DA namanye.
Inkonzo yokufihla lo mculi beyingakodalulwa.