UNGQONGQOSHE weMfundo ePhakeme, uDkt Blade Nzimande, uphonsele inselelo isikhulu esiphezulu seThuja Capital, uMnuz Mthunzi Mdwaba, akuba axolise ngokuphazima kweso ngokumbheca ngobende ekubeni inyama engayithanga mbibi.
Esitatimendeni esithunyelelwe abezindaba ngoLwesihlanu, okhulumela ungqongqoshe uMnuz Ishmael Mnisi, uthe uNzimande akakwazi ukuthula, asonge izandla ekubeni isithunzi sakhe sidicilileka phansi kulandela isitatimendi sikaMdwaba.
UMdwaba usola uNzimande namanye amalungu ekhabhinethi, noNobhala-Jikelele we-ANC, uMnuz Fikile Mbalula, ngokuthi babefuna abagwazele mayelana nesivumelwano se-UIF.
UMnisi uthe uNzimande akakaze afune noma athumele noma ngubani kuMdwaba ukuze ahlomule ngeqatha likaR5 million esivumelwaneni se-UIF esiwuR5 billion, njengona uMdwaba usitholile ukuze adale ngaso amathuba emisebenzini.
"UNzimande uzothumela incwadi yamademeshe kuMdwaba ngokungcoliswa kwegama lakhe esidlangalaleni," kuphetha uMnisi.