UMMELI wodumo u-ADV Zandile Mshololo, ogqame ecaleni lokubulawa kukaSenzo Meyiwa, owayengunozinti weBafana Bafana, ne-Orlando Pirates, kulindeleke ukuthi kule nyanga esombulukayo, ahlanganyele nabesifazane eNand, eThekwini.
UMbhishobhi Vusi Dube, we-Ethekwini Community Church, noyilungu lesiShayamthetho elimele i-ANC, ukuqinisekisile ukuthi u-Adv Mshololo, uzocobelelana nembokodo ngaphansi kwengqikithi ethi, I Can Do It.
“Le ndumezulu yomcimbi izobe isehhotela i-Octavia Boutique, ngo-Agasti-5. Okunye okumele bakulindele ngaphandle kwenkulumo eyakhayo ka-Adv Mshololo, kuzobe kukhona noDkt Taki Dube,” kuchaza uDube.
Umfundisi uDube unxusa abesifazane ukuthi baphume ngobuningi babo ngoba kuningi abazokuzuza emcimbini.