UTiK Tok umthathe wambeka esicongweni uSthembile Dlamini abaningi abamazi ngoMadlamini kumavideo avamise ukubonakala kuwo kule nkundla yokuxhumana. UMaDlamini, ozakhele udumo ngokuzifela ngabesilisa nangetemu elithi Forever Yena, usekushintshe konke lokho njengoba esephenduke usaziwayo, naye eseqashwa ukuzonandisa emicimbini bese ezitholela amasenti.
Le ntokazi iyiphakamisile indawo yaseNseleni yayibeka esicongweni njengoba ingasali uma ekhuluma. Umkhandlu uMlalazi ngaphansi kweMeya, uNkk Queen Xulu, sewumphendule isilomo nesitatanyiswa sawo uMaDlamini njengoba ngoFebhuwari 14 bagubha naye usuku lwezithandani. Njengoba lo mkhandlu uzobe ugubha uSuku lwabesiFazane, uqashe uMaDlamini ukuthi azonandisa kulo mcimbi ozokuba seTown Hall kusasa.
UMaDlamini uzobe engahambi yedwa, kuzobe kukhona nomsakazi woKhozi FM ophinde abe umculi, uPhindi P, noThobekile wodumo lwezidudla. Kwenzeka lokhu nje lo mkhandlu kade ukhipha izindlu ezinhlanu ulekelela labo abebezidinga. Imeya izophinde ixhase abesifazane abazobe bekulo mcimbi ngezinsizakusebenza ezizobalekelela ekutheni baxoshe ikati eziko.