ULAXAZE isicelo sebheyili ngesikhathi evele eNkantolo yeMantshi yaseThekwini namuhla, ngoMsombukuko, owesilisa osolwa ngokugwaza abulale owesifazane owayeyintombi yakhe ngenyanga eyedlule.
Isigameko esathatha impilo kaNksz Zama ‘Girlie’ Mthembu waseDondotha eMpangeni senzeka ngoDisemba 16, 2023 emijondolo yaseKenville eThekwini.
Ummangalelwa, uMnuz Mlamli Michael Qaba ongowokudabuka eNtabankulu e-Eastern Cape kodwa obehlala khona eKenville, kuthiwa wagwaza umufi amanxeba angu-25 emfica endlini kamngani wakhe.
Ngesikhathi evela namuhla enkantolo, iMantshi uSicelo Zuma ithe izolihlehlisela uLwesihlanu icala ngoba yize eselethiwe phambi kwenkantolo uQaba, idokodo lona alikafiki.
Abameli bakhe batshele inkantolo ukuthi ummangalelwa uthe ngeke ayicele ibheyili okwamanje.
Umsolwa (44) wakhalelwa amasongo kaSigonyela emva kokubhadanywa ngamaphoyisa esenyangeni yaseNtabankulu e-Eastern Cape ngoJanuwari 5.
Ngesikhathi eboshwa kuthiwa waficwa eqimbile nommese, okusolwa ukuthi wabulala ngawo umufi.
Emva kokwenzeka kwesigameko kwavela ukuthi umufi ubesemalile ummangalelwa kodwa wangakwamukela ukwaliwa njengoba aphetha ngokuthi amgwaze ambulale.
Ngosuku ambulala ngalo kuthiwa kwakukhona ingane (6) kamngani kamufi endlini, okuthiwa wamgwaza phambi kwayo.