UGWETSHWE iminyaka engu-25 ebhadla ejele owesilisa olahlwe icala lokuphanga nokubulala ngokungenhloso umshayeli wemoto ekhokhelwa ngebanga elihambile.
USimiphi Ntombela (31) ugwetshwe iNkantolo yesiFunda yaseNtuzuma ngoLwesibili.
Uliqule laze laphela icala egqunywe ezitokisini emuva kokuthi anqatshelwa ibheyili.
Ngesikhathi secala, uNtombela waqale wazibiza ngegama okungesilona elakhe ethi yena unguSiphamandla Mkhize.
Kwagcina kutholakele ukuthi yena ungubani emumva kokuthungathwa kutholakale umazisi wakhe.
Kuthiwa uNtombela waphinde wazenza umuntu ophanjanelwa ingqondo ngesikhathi sokuqulwa kwecala kodwa odokotela bathola ukuthi uphile saka.
Ugwetshelwe isehlakalo esenzeka ngoJanuwari 10 ngonyaka odlule okwagcina kushone kusona uMnuz Mpendulo Hopewell Mpungose (40).
Umufi, owayengumshayeli we-Uber, wathola isicelo esasivela kumuntu owayesePhoenix owayefuna ukuyiswa eDuffs Road.
Kuthiwa sebefikile lapho ayeya khona uNtombela nowesilisa ayekade ehamba naye, bakhomba umufi ngesibhamu bamfaka ebhuthini yemoto bashaya bachitha naye.
Bazithela emaphoyiseni ayekade eqaphe ubugebengu abona le moto eyiVW Polo eyayishayelwa budlabha ayishayela amasayini ezama ukuyimisa.
Kunokuba ame uNtombela wavele wabaleka ngesivinini, okwaholela ekutheni ijahwe imoto eyagcina ishayise isihlahla.
Bobathathu bakhishwa kule moto abezimo eziphuthumayo kusetshenziswa izindlawu baphuthunyiswa esibhedlela lapho uMpungose aphangalalela khona.
Omunye walawa madoda wakhululwa yinkantolo.