UFELE emanyaleni u-Emmanuel Mahamba waseMvuma, eZimbabwe, osebenza njenge-Personal Trainer ebanjwa nonkosikazi womuntu eRivonia, eSandton, ngoMgqibelo.
Ngokusho kwabazi izinhlangothi ezithintekayo, uMahamba naye oshadelwe futhi unengane encane ubejola nonkosikazi kamsolwa wase-Uganda uNtombizodwa ongumkhaya wakhe. Kuthiwa intombi le yazama ukuhlukana noMahamba ngemuva kokuthi umyeni wayo esezwile ngomjolo wabo.
Kuqubuke ingxabano umyeni ebhadama uMahamba nonkosikazi wakhe ekhoneni lika-12th Avenue, eholele ekutheni umsolwa obehamba ngeveni iFord Ranger ensundu agandaye ishende lenkosikazi ephindelela walishiya lithule.
Okhulumela amaphoyisa uColonel Dimakatso Nevhuhulwi uthe izolo kuvulwe icala lokubulala ukuze kuqhutshekwe nophenyo.
"Akekho oseboshiwe kanti yonke imigudu yokuthungatha umsolwa iyalandelwa," kusho uNevhuhulwi.
