UMLINGISI weThe Queen, uThembsie Matu, olingisa indawo kaPetronella kulo mdlalo usecele ukuthi iNingizimu Afrika imthwale ngemikhuleko emuva kokuthi eshonelwe wumyeni wakhe weminyaka.
Lo mlingisi obeshade noPeter Sebotsa, uthi indlela agqemeke ngayo ayinakulinganiswa nalutho.
Ubhale kwi-Instagram ukuthi umyeni wakhe umthole esethule kwi-swimming pool.
“NgoLwesine ngilahlekelwe kabuhlungu wumyeni esengibe naye iminyaka engu-36. Lesi yisikhathi esinzima kakhulu kithina.
Ngicela nisikhulekise njengoba silungiselela umngcwabo wakhe nangemuva kwawo. Singumndeni okhonza uNkulunkulu. Siyakholwa ukuthi uzoba nathi kulesi simo esinzima,” kusho uThembsie.
Akathandanga ukwenaba ngezizathu eziholele kulesi sigameko. Kodwa ukuqinisekisile kweminye imithombo yabezindaba ukuthi umthole entanta e-swiming pool esemzini wabo ose-Alberton, eGoli.
Omunye wabaphathi beThe Queen obuye abe ngumlingisi kuyona uConnie Ferguson, udlulise amazwi okudabuka kwakhe kuThembsie ngokushonelwa wumyeni.
“Sidlulisa ukudabuka okukhulu ngokushonelwa kukaThembsie. Siyasiqonda isimo obhekene naso kumanje.
Sidlulisa ukudabuka okukhulu kuwena nomndeni. Sithi umyeni wakho alale ngokuthula nathi siyanikhulekisa ukuthi niqine kulesi sikhathi,” kusho uConnie.
Nabalandeli balo mlingisi bebelokhu bewakhiphe njalo amazwi enduduzo bewabhekise kulesi silomo somlingisi.
Njengoba abantu bengayi nganxanye bengamanzi, kukhona abebelokhu bebelesela ngokuthi bacela ukuthi lo mlingisi abanike imininingwane ephelele ngokuthi ushone kanjani umyeni wakhe.
Kwenzeka lokhu nje, bekungakapholi maseko kuvele izindaba ezithi owayengumethuli wohlelo lwakuMzansi Magic, i-Our Perfect Wedding, uKayise Ngqula naye ushonelwe wumyeni wakhe engozini yemoto.
Lezi zithandani kuthiwa bezindawonye emotweni okwehle kuyo ingozi. Banengane enezinyanga eziyisishiyagalombili izelwe.
Nakhona abalandeli balo saziwayo bebelokhu bezwakalise njalo amazwi endunduzo kuKayise ngokumehlele.