SIZOXOLISA emphakathini wangakubo eSikhaleni, KwaZulu-Natal isiboshwa esidonsa isigwebo sikadilikajele neminyaka engu-15 ngecala lokubulala nelokuphanga udokotela owayewusizo kulo mphakathi esigamekweni esenzeka eSikhaleni ngo-1998.
USiyabonga Dlamini wagwetshwa ngo-2003 ngokubulala uDkt Nhlanhla Charles Masuku.
Umndeni kaMasuku, amalungu omphakathi noDlamini bahlanganyele esontweni, iMethodist Church of Southern Africa kulendawo kuzokhunyelwana umlotha.
UDlamini usedonse iminyaka engu-18 ejele laseWestville. Uzakwabo kuleli cala ubhadle ejele laseNewcastle futhi akayona ingxenye yalolu hlelo namuhla.
Kuthiwa laba ababili bazenza uziguli ngesikhathi bethelekela uMasuku endaweni ayesebenza kuyona kuleli lokishi.
Kuthiwa babekade beze komunye umuzi, befuna othile wakhona mayelana nezidakamizwa. Ababemfuna kwathiwa akekho uye eThekwini uzobuya ntambama.
Ngenxa yokuqaleka lamadoda kuthiwa abe esebona intuba yokuthi bayophanga imali uMasuku base beyamdubula washona.
UMasuku usazoqhubeka nokudonsa isigwebo sakhe njengoba esalelwe iminyaka eyisikhombisa ngaphambi kokuthi kucutshungulwe isicelo sakhe sikashwele.
Okhulumela uMnyango wezokuHlunyeleliswa kweziMilo KwaZulu-Natal, uMnuz Thulani Mdluli, uthe lolu wuhleli lomnyango wabo lokubuyisana kwezinhlaka ezimbili, okuba umndeni kamgilwa nesiboshwa.
Uthe uDlamini wayesemncane kakhulu enza lesigameko athe uyazisola ngaso.
"UDlamini sesamxhumanisa nomndeni wakwaMasuku washo konke okwenzeka nokuthi wakwenzelani wayesecela uxolo. Manje useze emphakathini wangakubi usezocela uxolo," kusho UMdluli.