UNGQONGQOSHE wezokuBusa ngokuBambisana neziNdaba zoMdabu kuzwelonke, uDkt Zweli Mkhize, usethole isicelo esiphuthumayo kuMcwaningi Mabhuku jikelele, sokuthi angenelele emuva kokusatshiswa kwabenza uphenyo kuMasipala weTheku nowaseMsunduzi.
Esitatimendeni uMkhize uthe uMcwaningi, uMnuz Kimi Makwetu, uthe ufuna kungenelele umnyango wezokuBusa ngokuBambisana emuva kokuthi kudingeke ukuthi kuhoxiswe abebenza uphenyo ngoba besatshiswa.
“Lezi zehlakalo ziyashaqisa futhi azamukelekile. Kwenziwe into engavumelekile, asikwazi ukuvumela isimo lapho kusatshiswa abantu abacwaninga amabhuku bangabe besakwazi ukwenza umsebenzi wabo. Kumele kuhlonishwe umsebenzi wezikhungo ezifana nalezi ziqhubeke nomsebenzi ngaphandle kokwesatshiswa,” kusho uMkhize.
Uthe bazosebenzisana neminyango yezifundazwe ukuqinisekisa ukuthi kuyaqhubeka ukwenziwa komsebenzi komasipala ababili.
USihlalo wekomiti elibhekele uMcwaningi Mabhuku ePhalamende, uMnuz Vincent Smith, uthe kuyaqala ukuthi kube nokusatshiswa kwabaphenyi KwaZulu-Natal wathi kwezinye izifundazwe yinto asebeke bayizwa.
Uthe akuvumelekile ukuthi kusatshiswe abasebenza kuleli hhovisi wathi kumele amaphoyisa aphenye abambe abenzi bobubi.
Umcwaningi usanda kudedela umbiko ongemuhle ngesimo somasipala bakuleli.
“Sinxusa abezepolitiki ukuthi basize izisebenzi zomcwaningi mabhuku ukuthi ziqhubeke nomsebenzi wazo. Kumele umcwaningi asebenze ngaphandle kokwesaba.”
IMeya yeTheku, uNkk Zandile Gumede, uthe bazoqinisa ezokuphepha kubasebenzi abenza ucwaningo.
Uthe kudingeke basheshe babuye ngemuva kokuzwa ngalokhu kade bengaphandle kwezwe.
“Ngiyalele inhloko yezokuphepha, uMnuz Dumisani Bhengu, ukuthi akhe uhlelo lokuvikela izisebenzi zomcwaningi mabhuku. Siyaxhumana nehhovisi likamcwaningi ukuze kuleli sonto babuyele bazosebenza,” kusho uNkk Gumede.
Uthe lesi sehlakalo akumele siphinde senzeke wathi bazimisele ekutheni bathole imibiko emihle yezimali.
UNgqongqoshe wezokuBusa ngokuBambisana neziNdaba zoMdabu, uNkk Nomusa Dube-Ncube, uthe uzophenya ngokushesha.
“Asikwazi ukuvumela ukuthi umcwaningi mabhuku aphume nyova komasipala ngoba esatshiswa. Senza yonke imizamo siwumnyango ukweseka omasipala ukuze bathole imibiko emihle yezimali,” kusho uNkk Dube-Ncube.