KUNXUSWA abashayeli abavame ukusebenzisa uN3 ngaseWestville, ukuthi bahlele kabusha uhambo lwabo ngoba uzovalwa umgwaqo ukuze kuqhubeke kahle umsebenzi wokuwulungisa.
Abe-South African National Roads Agency SOC Limited (SANRAL), bakhiphe isaziso ngokuvalwa kwesikhashana komgwaqo u-N3 ejikeni lika-St James Avenue (Pavilion interchange). Bathi inhloso yokuvala wukuthi kubekwe imishayo njengengxenye yomsebenzi wokuthuthukiswa kwebhuloho eliku-St James Avenue, phezu komgwaqo kazwelonke u-N3.
“Ukwakhiwa kabusha kwebhuloho kuyaqhubeka kulandela ukubhidlizwa kwalo ngoMashi 2024. Lokhu kuyingxenye yenqubekela phambili yomsebenzi wokuthuthukiswa kuka-N3 phakathi kweWestville, neParadise Valley,” kuchaza uJason Lowe, oyi-Eastern Region Geometrics Specialist Engineer.
Ukuvalwa kwesikhashana kwemigwaqo kuzokwenzeka kanje:
Ukuvalwa kwe-Loop E - umzila wezimoto uzodlula kuRamp D ukuze ujoyine imigwaqo engenela empumalanga ka-N3 ngalezi zikhathi:
Kusukela ngo-22:00 - 04:30, ngoMsombuluko Mashi 17, kuya kuLwesine ziwu-20 kuMashi, 2025.
Ukuvalwa komgwaqo u-N3 East Bound Carriageway: izimoto zizosebenzisa umgwaqo u-13 Spine, kusukela ngo-22:00 kuye ku-04:30, ngoMsombuluko ngo-Ephreli 14 kuya kuLwesine ziwu-17 Ephreli 2025.
Ukuvalwa komgwaqo u-N3 West Bound Carriageway - izimoto zizosebenzisa umgwaqo u-13 Spine, kusukela ngo-22:00 kuya ku-04:30 , ngoLwesine ziwu-24 Ephreli kuya ngeSonto ziwu-27 Ephreli, 2025.