LISUSE oseziko lambeka emnyango ngesikhathi kuhlelwa kabusha ubuholi be-ANC KwaZulu-Natal.
Bonke abebengabaholi be-ANC esifundazweni behliselwe izimendlela, izikhundla ezibalulekile zanikezwa abaholi obese kukhohlakele ngabo.
Ubuholi obusha be-ANC esifundazweni bumenyezelwe ngokusemthethweni nguNobhala Jikelele weqembu, uMnuz Fikile Mbalula, eThekwini, izolo.
Ebuholini obusha kukhona izingwevu okubalwa kuzo uMnuz Jeff Radebe osenguMdidiyeli wethimba, kube uMnuz Mike Mabuyakhulu onguMgqugquzeli wethimba, uNkk Weziwe Thusi, uyiPhini lokuQala loMdidiyeli wethimba kanye noNkk Nomusa Dube-Ncube oyiPhini loMgqugquzeli wethimba.
Bonke laba baholi bebengaphethe zikhundla ngaphambi kokuthi baqokelwe ethimbeni.
Phambilini, uRadebe uke waba yilungu lesigungu esiphezulu kwi-ANC kuzwelonke, uMabuyakhulu yena ubeyiphini likasihlalo we-ANC KwaZulu-Natal, ngaphambi kwengqungquthela eyakhetha ubuholi obuhlelwe kabusha.
UNkk Dube-Ncube uke waphatha izikhundla ezehlukene kwi-ANC KwaZulu-Natal, wahlulwa embangweni wokuhola i-ANC engqungqutheleni eyedlule.
Babili kuphela abaqokelwe ezikhundleni eziphezulu kulabo abebenezikhundla eziphezulu ebuholini obugudluziwe.
UMnuz Siboniso Duma uqokelwe kwesePhini lesiBili loMdidiyeli, kwathi obeyiphini likasihlalo, uNksz Nomagugu Simelane, waqokelwa kwesokuqoqa imali.
Obengunobhala, uMnuz Bheki Mtolo; obeyiphini likanobhala, uMnuz Sipho Hlomuka; nobengumgcinimafa, uDkt Ntuthuko Mahalaba, bonke kabalibonanga elidlalayo, bazokuba amalungu engeziwe ethimba.
Ithimba lakhiwe amalungu angu-67, ngokwejwayelekile isigungu esiphezulu esifundazweni siba namalungu angu-35.
Leli thimba lixube yonke inhlobo kapende njengoba kukhona izingwevu kanye nabebengabaholi bentsha.
Kubaholi abadala abasethimbeni ngoMnuz Sbusiso Ndebele, Dkt Sibongiseni Dhlomo noNkk Maggie Govender.
Kulabo ababengabaholi bentsha abaqokelwe ethimbeni kubalwa uMnuz Thanduxolo Sabelo noMnuz Kwazi Mshengu.
Umhlaziyi wezepolitiki waseNyuvesi yaKwaZulu-Natal, uMnuz Zakhele Ndlovu, uthe noma bangashintshwa kuze kube bangaki abaholi, i-ANC izoqhubeka nokuhluleka izinketho.
UNdlovu uthe i-ANC yaqala ukwehlelwa ukweseka kusaphethe bona laba baholi abaqokelwe ezikhundleni.
“Abantu abasayivoteli i-ANC ngenxa yokuthi ayizigcini izethembiso. Abantu bacasulwe ukungawatholi amathuba emisebenzi. Ukubuyiswa kwabaholi abadala kuzoyisiza ngani i-ANC? Kuzokwenza muphi umehluko emuntwini omusha ongasebenzi?”
UNdlovu uthe akujwayelekile ukuqokwa kwabantu abaningi kangaka ethimbeni, wathi mhlawumbe inhloso ukuvimba ukuthi kungabi khona abaholi abazohlubukela kwi-MK.
Usizi belubhalwe emehlweni kwabanye babaholi abehliswe ezikhundleni, abanye bazamile ukuziqinisa ngesikhathi bebona abezindaba.
UMbalula uthe amalungu eqembu akwamukele ukuhlelwa kabusha kobuholi.
“Ngempelasonto, besinemihlangano kuzo zonke izifunda zaKwaZulu-Natal, lapho sazise khona amalungu enhlangano ngokuhlelwa kabusha kobuholi. Yonke imihlangano ihambe kahle. Sithanda ukubonga amalungu enhlangano ngokuziphatha kahle. Akekho umuntu ofike emihlanganweni ephethe ocelemba.”
UMbalula uthe balandele yonke imigomo yeqembu ngesikhathi behlela kabusha ubuholi, wathi abacabangi ukuthi kukhona abangaya enkantolo beyophikisana nokuhlelwa kabusha kobuholi.
“Uma kukhona abafuna ukuya enkantolo, kulungile sesohlangana khona.”
UMbalula uthe ubuholi obusha bunikezwe izinyanga eziyisithupha ukuba buvuselele izinhlaka zeqembu.
“Manje siphelile isikhathi sokuthi silokhu sibalisa, sekuyisikhathi sokuthi sakhe kabusha i-ANC.”
Ubuholi obusha buthe buwulungele umsebenzi.
URadebe uthe bazokuba nomhlangano wabo wokuqala ngoMsombuluko, lapho bezoqhamuka neqhinga lokubuyisa bonke labo abashiye inhlangano.
