I-DA isinxenxe iPhalamende ukuthi lihoxise umbukiso wokuviliyela kwezindiza zoMbutho wokuVikela kuleli, uma uMengameli Cyril Ramaphosa, esethula inkulumo ebhekiswe esizweni eKapa.
Leli qembu libhalele uSomlomo wePhalamende uNkk Thoko Didiza, noSihlalo weNdlu yoMkhandlu weziFundazwe, uNkk Refilwe Mtsweni-Tsipane, libanxenxa ukuthi behlise isibalo samasosha azohambela lo mcimbi ozoba ngoLwesine ebusuku eCape Town City Hall.
Lo mcimbi uhambisana nokuvulwa kwePhalamende ngokusemthethweni kanti kuba nemibutho ehlukene, okubalwa nowokuvikela, osuke uviliyela ngezindiza emoyeni.
Okhulumela i-DA kwezokuVikela uMnuz Chris Hattingh, uthe inhlekelele eyenzeke eDemocratic Republic of the Congo (DRC), kusala enkundleni amasosha angu-14, akuleli ayebhekene nezihonga ze-M23, yenze babona ukuthi kumele ahlonishwe la masosha ngokuthi kwehliswe isibalo sazohambela umcimbi.
Uthe bafuna kumiswe nokuviliyela kwezindiza zalo mbutho kuhlonishwe amasosha atshalwe kuleliya lizwe.
“Isimo sibi eDRC ngakho ngeke kube kuhle ukuthi sisishaye indiva isimo esinzima amasosha atshaliwe abhekene naso, sifune kube namasosha azonandisa emcimbini ozobe uhanjelwe nguhulumeni nezimenywa. Amasosha ashoda ngezinsiza nokwesekwa ngakho ngeke kube kuhle ukuthi kube nazonandisa kulo mcimbi,” usho kanje.
Uthe njengoba kukhona amasosha asale enkundleni, kuzofana nokuthi uthimiselwa ngamathe umsebenzi walawo asale enkundleni.
“Kuzobe kungasho lutho ukuviliyela kwamasosha ePhalamende ekubeni kufana nokuthi kuziliwe. Akusona isikhathi sokujabula kodwa esokuzinuka amakhwapha sibheke lapho bekumele siqinise khona izinto.”
Uthe yisikhathi sokuthi kuhlonishwe kuphinde kukhunjulwe abasale enkundleni.
“Silinde impendulo kasomlomo kulolu daba. Sinethemba kodwa lokuthi uzokwenza okufanele,” kusho uHattingh.
NgoLwesithathu uNkk Didiza noNkk Mtsweni-Tsipane, banesithangami nabezindaba lapho bezokhuluma ngamalungiselelo enkulumo kaRamaphosa ebhekiswe esizweni, nokuvulwa kwePhalamende.
Kulo mcimbi oqala ngokuthi kube nokhaphethi obumvu lapho kuhamba khona izimenywa namalungu ePhalamende asuke eshiyana ngomshefezo ngakwezengqephu, kufika nababengomengameli bezwe bakuleli.
UMnyango wezokuVikela ugcine uwadedela amagama amasosha asale enkundleni okungoStaff Sergeant William Eddie Cola, Staff Sergeant Molahlehi Ishmael Molahlehi, Staff Sergeant Shwahlane Theophilus Seepe, Corporal Matome Justice Malesa, Corporal Rinae Nemavhulani, Lance Bombardier, Itumeleng Macdonald Moreo, Lance Corporal Tseke Moffat Molapo, Lance Corporal Metse Stansly Raswiswi, Rifleman Sebatane Richard Chokoe, Rifleman Derrick Maluleke, Rifleman Tshidiso Andries Mabele, Rifleman Calvin Louis Moagi, Rifleman Mokete Joseph Mobe noPrivate Peter Jacobus Strydom.