SEKUQUBUKE okukhulu ukungezwani engxenyeni yomphakathi waseZibomvu, eMondlo, KwaZulu-Natal, ngenxa yokugconana kwamanye amalungu akhona, ethukana ngezifo ezithile osekutholakale ukuthi aphila nazo.
Lokho kuthiwa kudalwe wukusabalala nokusaphazeka kwamafayela eziguli zakomunye wemitholampilo yakule ndawo, eSiyakhathala okukholakala ukuthi kudalwe “wukuba budedengu” kwabasebenzi bakhona.
Umthombo weSolezwe odonse intatheli ngendlebe ukuthi ingalivezi nangephutha igama lawo, uthe isisusa sale nkinga eyenzeke emasontweni amabili edlule, bude buduze nalo mtholampilo, kwatholakala amafayela eziguli esaphazekile.
“Kuqale kanjalo-ke abantu bezitapela amafayela eziguli ezithile zakhona endaweni, kwaze kwafika lapho abanye emphakathini sebegconana ngakho lokho ngoba bazi ukuthi umuntu unesifo esithile. Singamalungu omphakathi sikhathazekile ngokuthi uma lesi simo siqhubeka kanjena, le nto ingagcina ibhebhethekisa udlame nokungezwani emalungwini omphakathi,” kusho umthombo.
Uqhuba, uthe ngendlela isimo esesishube ngayo endaweni, udaba seluze lwangenelwa nawubuholi bomphakathi kodwa izingxoxo zafika kwangqingethe ngenxa yokuthi akulula ukuphuca abantu amafayela, njengoba abe maningi kakhulu futhi akwaziwa ukuthi ingxenye yawo ikobani.
Kuthintwa isazi sezomthetho esizimele, u-Advocate Mpumelelo Zikalala, sithe wumsebenzi wawo wonke umuntu obhekelele imininingwane yeziguli ukuqinisekisa ukuthi ayifinyeleleli emehlweni, ezindlebeni nasezandleni zabantu abangafanele.
UZikalala uthe umthetho olawula ukusebenza kwezikhungo zezempilo nomthetho ovikela imininingwane yabantu i-Protection of Personal Information Act yango-2013, akukuvumeli ukuthi abesebenzi bezikhungo zezempilo benze iphutha elinjena.
“Ngakho kungaba yiphutha elikhulu ukuthi imininingwane ebucayi njengalena ifinyelele ebantwini okungafanele ukuthi ifinyelele kubona. Esimweni esinjena lapho sekwenzeke iphutha elinjena khona, lowo othintekayo noma obona ukuthi ilungelo lakhe lihlukunyeziwe, angabhalalela isikhungo sezempilo esithintekayo, noma athathe izinyathelo zomthetho.
“Nokuthi-ke uma sekunjena, kusuke sekukuncane kakhulu okungenziwa ukulungisa omonakalo owenzekile, ngaphandle kokuthi abesikhungo esithintekayo baxolise kwabathintekayo, bazibophezele ukungaliphindi iphutha elinjena,” kusho uZikalala.
Imizamo yokuthinta ikhansela lakule ndawo, uMnuz Linda Mtshali, ayiphumelelanga njengoba ucingo lwalo belukhala umlibe, lungabanjwa futhi langawuphendula umyalezo elithunyelelwe nge-WhatsApp.
Okhulumela uMnyango wezeMpilo esifundazweni, uMnuz Nathi Olifant, uthembise ukubuyela entathelini uma sekukhona angakuphawula ngalolu daba.