UPHIKO lwabesifazane i-ANC Women's League selukhwele lwadilika kwiMeya yaseZululand, uMfu Thulasizwe Buthelezi ngokuzenza ibhoklolo kwiPhini likaSihlalo we-ANC, eKZN uNks Nomagugu Simelane.
Kwenzeka lokhu nje, uButhelezi usasazele uNkk Simelane ngabameli, emsola ngokumehlisa isithunzi ngesikhathi ekhuluma kwingqungquthela ye-ANC ebiseVryheid ngempelasonto.
Encwadini esabalaliswe ezinkundleni zokuxhumana, abameli bakaButhelezi bathe inkulumo kaNkk Simelane yamhlambalaza, yena siqu nokuba yimeya.
"Siyalelwe ukuba sifune ukuthi uhoxise inkulumo yakho ngokusemthethweni nasesidlangalaleni kungakapheli izinsuku eziyisikhombisa uthole lencwadi.
“Uma uhluleka, ikhasimende lethu lizofuna amademeshe ka-R10 million kuwe njengesinxephezelo ngokuziphatha kwakho okungalungile nokungekho emthethweni.
“Sibuye sayalelwa ukuba silibeke ngembaba elokuthi ikhasimende lethu liziphika lilala ngomhlane izinsolo elibekwa zona lokuziphatha ngendlela engavumelekile," kuqhuba incwadi.
Unobhala wophiko lwabesifazane kwi-ANCWL, uZama Sokhabase uthe lencwadi yabameli bakaButhelezi iyimizamo yokugqiba ihlazo elenziwa nguButhelezi njengoba esolwa yinqwaba yabantu besifazane ngokubahlukumeza ngokocansi eMkhandlwini waseZululand.
UZama uthe ukusabisa ngezinyathelo zomthetho kuyizinkomba zobubhoklolo kukaButhelezi kuNkk Simelane ngoba ezama ukugwema izinsolo ezibhekiswe kuye.
NgeSonto i-ANC esifundeni iMzala Nxumalo ikhiphe isitatimende ngokuhlukunyezwa kwabasebenzi besifazane okubandakanya uButhelezi kumasipala awuphethe.
Sithe isitatimende sekungunyaka wesibili abasebenzi besifazane behayiza ngokuhlukunyezwa ngokocansi wuButhelezi. Siqhuba, sithe bayisithupha abesifazane asebekhonjwe indlela kulo masipala ngenxa yokwenqaba ukuzitika ngocansi noButhelezi.
Nakuba kunjalo kodwa uButhelezi uthe konke lokhu kungamanga kodwa itulo elakhiwa ngokuhlanganyela ngamalungu e-ANC naweNFP ngenhloso yokudicilela phansi isithunzi sakhe.