INKAMPANI yezimoto yaseChina iJAC Motors igubha iminyaka eyisikhombisa eNingizimu Afrika ngokuzibophezela ekudlondlobaleni kuleli.
Muva nje iJAC ivule indawo entsha egcina amaphathi ubukhulu bayo obuphindwe kabili kunendala eseRoodepoort, eGauteng.
Isikhulu esiphezulu sale nkampani eNingizimu Afrika, uKarl-Heinz Göbel, sithe bayaziqhenya ngokuvula le ndawo futhi izozuzisa amagaji abo, ama-panel beater kanjalo namakhasimende ukwenza isiqiniseko sokuthi azohlala egculisekile.
Njengamanje iJAC efike kuleli ngo-2017 inamagaraji angu-71.
I-JAC ithembise ukwethula izimoto ezintsha phakathi kwalo nyaka nozayo. Ezimotweni ezizayo kubalwa i-SUV kanjalo neloli elithwala impahla esindayo.
Njengamanje izimoto ezidayisayo kubalwa amaveni namaloli.
Amaveni akhona abizwa nge-T series okukhona kuwo iT6 eqala kuR379 900 kuya kwiT9. I-T9, eqale ukudayisa kusuka ngoFebhuwari nonyaka yiyo umakhonya emndenini njengoba idle ngobukhulu. Incintisana namaveni okubalwa kuwo iToyota Hilux, Ford Ranger, Isuzu D-Max, GWM P-Series, Nissan Navara nezinye.