UMREPHA uBig Zulu umangaze abaningi eshaya izidudla ngeBMW M3 Competition yakhe emcimbini iMsinga Driftkhana, ngempelasonto.
Lo mrepha ufike emini eMphelankani Entertainment Centre lapho bekunomcimbi khona iMsinga Driftkhana obekungoka-11 ukhona.
Uyiphendule kwahlanya izihlwele iM3 ngaphambi kokuthi athathe umbhobho acule amanoni akhe aziwa ngawo.
UBig Zulu bekungeyena yedwa obedlala izimoto njengoba bekukhona izilomo okubalwa kuzo uMagesh Ndaba, Stacey Lee, Lefa, Reyz nabanye.
Kuke kwaba nesikhathi lapho bekuqhudelana khona amaGusheshe namaBMW M4 Competition namaMercedes-AMG C 63 ngokuphenduka.
Abantu bebephume ngobuningi babo emcimbini yize bebengagcwele phama.
Phakathi kwezimenywa ebezikhona kubalwa iMeya yaseMsinga uMlethi Ndlovu nenkosi yesizwe saKwaMabaso uThokozani Mntungwa
Kuthe kusongwa umcimbi kwanandisa oDJ BZ, Kamccza, DJ Mngadi nabanye. Umculi wekwaito uL'vovo ucule bukhoma uhlelo luphethwe ngumlingisi uNelisa Mchunu.