UZOZWAKALA emoyeni emuva kwesikhathi eside agcina ukuzwakala esakaza emoyeni uZanele “Mazetzet” Mbokazi, njengoba ezobe esakaza uhlelo iNdumiso kuKhozi FM.
Kusasa lolu hlelo olungena ngo-9 kuya ku-12 njalo ngamaSonto luzobe luhlanganyelwe nguMazetzet noThembeka Zondo.
Ekhasini lakhe le-Instagram umemezele lokhu wanxusa nabalandeli bakhe ukuthi batshele abanye ukuthi uzozwakala emsakazweni ayewusebenzela kudala.
“Tshela umakhelwane wakho, ugogo nomkhulu nomalume ukuthi nali leli phimbo likaMazetzet. Emuva kweminyaka engu-20, kusasa ngeSonto la-Agasti 14, ngizosakaza iNdumiso ngo-9 kuya ku-12 kuKhozi FM,” usho kanje.
Lokhu kwenzeka njengoba kuyinyanga yabantu besifazane ukuthi kumenywe abesifazane abathile ukuba bazosakaza ezinhlelweni ezihlukene zemisakazo.
Khonamanjalo uHappy Ngidi wenhlangano iProudly South Africa, ubesakaza emsakazweni iPower FM ngaphansi kwalolu hlelo.