LISHAYE ungqimphothwe maqede lavuka lafongqa isigqoko laxolisa iciko likamaskandi Igcokama Elisha ngokugxibha umcimbi kaKhuzani i#Gcwalisai-Mabhida ozoba ngoMashi 30 eThekwini.
IGcokama livele ezinkundleni zokuxhumana nasemaphepheni ligxibha umcimbi, lithi aliyingeni indaba yawo ngoba owe-ANC. Engxoxweni yalo neSolezwe ngeSonto bese licula enye ingoma njengoba lithe liyazisola ngakho konke okubi elike lakusho, lidlale umuntu othile ebelisebenzisana naye obelifunza ushevu.
“Ngicela uxolo kubo bonke abantu bakuleli nakuyona i-ANC uqobo. Sengehlukene nalo muntu obengilahlekisa, ngeke ngiphinde ngisebenze naye. Anginankinga noKhuzani, nomcimbi anginawo futhi umona ngawo,’’ kushweleleza Igcokama. Lithe lo muntu walihlohla nangokuthi lihlele umcimbi ngosuku olufanayo nalo mcimbi waseMoses Mabhida ngenhloso yokubaqhatha noKhuzani. Lithe aliyithandi indaba yokungezwani kwalo noKhuzani ngoba kudala uqhekeko nakubantu abathanda umaskandi.
“Lo muntu ubexova ngenhloso yokwenza imali, ngenza uphenyo ngathola ukuthi uyixoki,’’ kusho
Igcokama.
Uphenyo lweSolezwe ngeSonto luveze ukuthi lo muntu okhulunywa ngaye uMpilo 'Matshitshi' Manyathi.
Uthe akanaso isivumelwano esibhalwe phansi neGcokama ubengumeluleki walo elisiza nakwezinye izinto esebenzisa inkampani yakhe.
''Sinesikhathi singakhulumi ngoba ubudlelwano bethu sebumuncu impela. Akangasho ukuthi ungixoshile ngoba akaze angiqashe vele. Unengcindezi ngoba imbangi yakhe imhlula ngamalengiso. Mina ngiyaya eMoses Mabhida, angikaze ngisho ukuthi angayi yena noma akhulume kabi ngomcimbi,'' kuchaza uManyathi
Liphinde laphawula nangomhlangano elibe nawo noNgqongqoshe wezobuCiko namaSiko kuzwelonke, uMnuz Nathi Mthethwa, ogqugquzela ubumbano kumaskandi.
"Ubaba uMthethwa ukhulume into enhle eqondile esiyala njengezingane zakhe. Ngiyawubonga umhlangano engibe nawo naye ngoba ukhombisile ukuthi ufuna kubumbane abantu, kuphele ukungezwani," kuchaza Igcokama.
Abenhlangano ehlela umcimbi kaKhuzani, Indlamelenze Development Foundation, bathi bayalwemukela uxolo lweGcokama uma luvela enhliziyweni.
UMnuz Mthokozisi Zuma onguMqondisi wenhlangano, uthe akaze babe nenkinga naleli ciko kwasekuqaleni.
“Siyabonga uma esewabonile amaphutha akhe futhi sikubona kuwubuntu abenzile. Ngamukela uxolo, ngikhulumela ithimba engihlela nalo, hhayi abanye abantu abathintekayo kulolu daba ngoba kufanele baziphawulele bona," kusho uZuma.
Ngokuqasha Igcokama, uthe babeke bazama ukuliqasha kodwa izingxoxo zangaphumelela.
UZuma uphinde wanxusa abantu ukuthi baqhubeke bathenge amathikithi ngoba usuku lomcimbi luyasondela, kufanele bayoqopha umlando.