NGIZOHLALE ngikuveza njalo kule ngosi ukuthi ngiwumuntu ozinakisisayo izinto ezithile, ikakhulu lezo ezingihlaba umxhwele, engingabala kuzona umculo, wumsakazo nobuciko nje jikelele.
Ngingenisa kanjena nje kulokhu, yingoba ngifuna ukuzokhuza umkhuba omubi engibona wanda kubalandeli bomculo, ikakhulu abathandi bakamaskandi, wokuthanda ukuphawula ngezingoma zamaciko ehlukene, ezinye zawo abasuke bengakazilaleli.
Ukuchema nabaculi abathile kwenza abanye abalandeli balo mculo wesintu - ikakhulu abakaKhuzani Mpungose nembangi yakhe enkulu uMthandeni Manqele - bajwayele ukuvele bahheme uma umuntu ephawula ngengoma yeciko angalithandi.
Umuzwa ekhuluma nje umuntu oze ngomqondo omubi wokuthi yena ulalela iqhawe lakhe kuphela, bese uxakeka ukuthi manje pho uphawulelani ngengoma yeciko angalithandi futhi engakaze azihluphe nangokulalela ingoma yalo ephume ngaleso sikhathi?
Ngiphoxeke kabi nje ngesonto eliphelile, ngifunda ukuphawula kwimpikiswano yabanye babalandeli bala maciko angaconsi phansi kumaskandi. Bebegxeka izingoma zawo ngokwehlukana kwazo, kodwa kuzwakala ukuthi umuntu ukhulunyiswa yinzondo, akakaze ayizwe nhlobo le nto ayihlabayo.
Uzwe umuntu esethi angifuni kwakuyilalela ingoma kasibanibani, iyabheda nje. Hawu! Ibheda kanjani into ongayazi nongakaze uyizwe? Kanjani? Kuba ngcono uma umuntu ehlaba ingoma ethile, ngendlella efanele nekhombisa ukuthi uyilalelile, futhi enze kube sobala ukuthi kungani engahambisani nayo. Lokho kwenza noma ngabe awuhambisani nombono wakhe, kodwa ukwazi ukuwuhlonipha.
Ngibona kuwumkhuba omubi lona nokumele ukhuzwe kumanje ukuze ungabhebhetheki, ngoba ugcina udweba isithombe esibi ngomculo wamaciko athile. Into ezosiza wukuthi umuntu aqale ngokulalela ingoma yeciko elithile kuqala andukuba aphawule ngayo, nakhona futhi abe nendlela enesisoka necolekile eveza ukuthi uzizwa kanjani ngaleyo ngoma noma i-albhamu yomculi othile. Nakho futhi ukuthula ungasho lutho, akulimazi muntu. Akuzona zonke izinto okumele sibe nemibono kuzona. Amen!