ISILOMO sikaphrojusa wamapiano, uKelvin Momo, sengezwe ohlwini lwezintandokazi ezizonandisa kwiCape Town International Jazz Festival osekusele izinsuku ezingaphansi kuka-25 ukuthi isingathwe.
UKelvin uzakhele udumo ngohlobo lwamapiano alubiza nge-private school amapiano.
Leli ciko ogama lalo lokuzalwa nguThato Kelvin Ledwaba, kuthiwa luza nento ezomangaza abantu bangafisi ukuthi ibaphuthe emcimbini.
Ngonyaka odlule, uKelvin ukhiphe ama-albhamu amabili iSewe neNtsako agabe ngezingoma okubalwa kuzo iWaze Wamuhle.
Kulo mcimbi ozoba seCape Town International Convention Centre ngo-Ephreli 25 no-26, uzojoyina inqwaba yezingwazi esezimenyezelwe. Phakathi kwazo kubalwa uBlack Coffee noNduduzo Makhathini, Ivan Mazuze, umzwilili uLira, Thandiswa Mazwai, Kyle Shepherd Trio, Benjamin Jeptha ehamba nebhendi iKujenga, Ari Lennox, Linda Sikhakhani, Nomfundo Xaluva, Victor Masondo Quartet epike uThembi noBheki Khoza, Plurism, Bombay Lights, The Ploemies, Bongeziwe Mabandla nabanye.
Izolo abahleli baphinde bamemezela abanye abaxhasi asebejoyinile okuyiPassanger Rail Agency of South Africa (Prasa) neHeart FM.
Uma useKapa kuvunguza umoya womcimbi njengoba kunezikhangiso zawo.