INDODAKAZI yomculi kamaskandi ongasekho, uMgqumeni "Idlamanzi" Khumalo, iqophe umlando ngokumela abaculi besifazane emqhudelwaneni wokubanga ukunandisa kwiGcwalisa Spring Picnic eseHollywoodBets King’ Park Stadium eThekwini, ngoNovemba 4.
UKusaselihle "Izinyane Ledlamanzi" Dlamini, wuyena kuphela umculi wesifazane ongene kwiTop 30 futhi uqhathwe nezingwazi ebezicula noyise, ebezingcweka naye ezinjengoThokozani Langa, Shwi, Khangelani "DSD" Mhlongo, Abafana BakaMgqumeni, Jaiva Zimnike, no-Ali Mgube.
Izinyane Ledlamanzi lithe kusho lukhulu kulo ukudlana imilala nabaculi elikhule libukela kubo.
"Kungijabulise kakhulu ukuzibona ngisemqhudelwaneni wokuthi ngikwazi ukuyonandisa kwiGcwalisa Spring Picnic: All White. Kube yinto enkulu kimina ngoba akukhethwanga ngokuthi ngiwumuntu wesifazane.
Bengikholelwa ukuthi kunohlelo oluthile oluzosebenza ekuhlungeni abantu besifazane kodwa amandla enginawo nothando olukubantu ngami, kube sekuphoqa ukuthi ngifakwe phakathi kwazo ezinye izinsizwa, ngiqhudelane nazo."
Uthe okumjabulisa kakhulu wukuthi uyazihudula ezinye zezingqungqulu njengoba engakaze waphuma ngaphezu kuka-14.
"Okukhomba ukuthi amandla enginawo nami ayangethusa ngoba ngisemusha endimeni futhi kusekuningi ebengikucabanga ukuthi angikakakufezi ngendlela yokuthi sengihlonishwa ngaleyo ndlela."
Le ntokazi inxuse abantu besifazane ukuba baqhubeke nokuyivotela ngobuningi ukuze igcine engenile kwiTop 10 yabaculi abazoqashwa emcimbini.
Ithe iyakujabulela ukuba semncintiswaneni nezinsizwa ezasebenza noMgqumeni nezizalana naye ngoba bonke bamele indlunkulu.
Izinyane Ledlamanzi lizalwe ngoNovemba 2001 futhi liyiwele nengane eyadlula emhlabeni ngo-2003. Likhuliswe wugogo eNgoje, eVryheid ngoba unina ubesebenza eGoli.
Lifunde laze laphothula izifundo zePublic Relations eCentral Technical College, eCape Town ngonyaka owedlule. Liqale ukucula nyakenye ngaphansi kweso likaThabani "Mfumbathi" Mdluli waseNtondweni.
Ngonyaka owedlule Izinyane Ledlamanzi likhiphe umucu osihloko sithi Amancoko lizibiza ngoMsuliwezinyembezi ngaphambi kokukhipha i-EP esihloko sithi Inkalakatha.
Libuye laqopha ngokubambisana nendodakazi yeNdidane, uKhonzogcina Gcwensa, bezibiza ngaBalami Bami neGedegede.
*Ukuvotela Izinyane Ledlamanzi ungena ekhasini leFacebook leGcwalisa Spring Picnic All White.