IQEMBU leR&B ne-a ccapella, iBoyz II Men, lizoluvala eThekwini uchungechunge lwalo lwamakhonsathi akuleli ngoNovemba 5. Ngokwesitatimende esithunyelwe kwabezindaba namhlanje, iBoyz II Men, izonandisa eNkosi Albert Luthuli ICC.
UThato Segoale weVertex Events, uthe bathintwe ngabathandi bomculo waseThekwini ukuba bangeze ikhonsathi yokugcina kuleli dolobha.
"Ngokuba yizingwazi eyizo, iBoyz II Men, ikuthakasele kakhulu ukujabulisa abalandeli bayo baseKZN ngokwengeza enye ikhonsathi (kulesi sifundazwe).
Siwabheke ngamehlo abomvu amakhonsathi amane angungqaphambili lapho leli qembu lizobe licula bukhoma kuzo zonke izingxenye zakuleli ekupheleni kwalo nyaka," kuphetha uThato.
IBoyz II Men izovula uchungechunge lwayo ngekhonsathi ezokuba seGrand Arena, eGrandWest, ngoLwesibili lwango-Okthoba 31. Izosuka lapho ibhekise amabombo eSunBet Arena, eTime Square, ePretoria ngoLwesine lwangoNovemba 2.
Leli qembu lizodlulela eSunbCity Superbowl eNorth West ngoMgqibelo wangomhla ka-4 Novemba ngaphambi kokuphetha imbenge eThekwini ngeSonto langomhla ka-5 Novemba.
IBoyz II Men, ebuye iteketiswe ngele-Unique Attraction, seyibophele ezintathu zasePhiladelphia, e-USA okunguNathan Morris, Wanya Morris noShauwn Stockman. Ilungu lesine uMichael McCary lashiya kuleli qembu ngo-2003 ngenxa yokuhlaselwa wukugula.
Ukuhoxa kwaleli qhawe elalinezwi eliyidoshaba, iBoyz II Men ayiphindanga yafana nakuqala. Nakuba kunjalo kodwa umculo wayo kawubuni neze.
Abazohambela la makhonsathi kulindeleke ukuba bazitike ngamanoni anjengalawa: End Of The Road, I'll Make Love To You, On Bended Knee, Doin' Just Fine, 4 Seasons of Loneliness, One Sweet Day, Thank You In Advance nelithi It's So Hard To Say Goodbye To Yesterday. Abaxhasi balolu chungechunge lwamakhonsathi yiKaya FM neKFM 94.5.
Amathikithi aseqalile ukudayisa eTicketPro ngemali esukela kuR390 kuya kuR1390.