ISIHLOKO: Take Your Time
UMCULI: Limit
UHLOBO: Maskandi
UMHLAZIYI: CHARLES KHUZWAYO
ULIMIT Nala ngomunye wabaculi abafike kwezwakala kulo mculo. Umculi lona okhulunyelwe yingoma kubahleli bemicimbi nakubasakazi. Akanaminyaka emingaki ekule ndima kodwa usedumise okomfazi odlisayo.
Ubufakazi balokho ukuhlala kwakhe phambili emqhudelwaneni weQuantum kwi-Mother of All Maskandi Festival.
Abukeka esemancane amathuba okuthi aficwe njengoba esecela ku-100 000 amavoti asewatholile kulo mncintiswano.
Kule albhamu uLimit uhlanyisa izihlwele ngengoma eshisa bhe esihloko sithi Awuhlabe Kabili. kuYouTube leli culo selidlalwe ngaphezu kuka-3.3 million.
Akusiyo kuphela le ngoma echaza abaningi. Kukhona ethi KuLate KuLate. Nayo seyidlalwe amahlandla angaphezu kuka-1.6 million.
Akusiyo neze into encane leyo kumculi kamaskandi, ikakhulukazi ofikayo. Kuleli cwecwe ubophele uMaGumede engomeni ethi Emhlangeni noMlabalaba, engomeni ethi Njengesitimela.
Ezinye izingoma ezehla esiphundu ngezithi Ngizosuke Ngimusho ebengithi uyicula neNkosi Yamagcokama, Umlingo, Amagucci, Ngihlanya Ngempela, Kufa Ulixoki, Hamba Uyobona, Sebeyayidla, Isiyalawulana, Uchitha Ngawe Isizungu, Inhliziyo Yami neTake Your Time.
Ukhumbule ukuthi ngonyaka owedlule ubeshisa engabaselwe ngengoma ethi Ufusegi Ufusegi. Uma uzifela ngomculo omnandi nonezingoma zehawu, kuzofanele uzitholele leli cwecwe.