KUCHAZEKE izihlwele umlingisi woMkhokha:The Curse, eveza amakhono akhe wonke ngesikhathi esisodwa emcimbini.
UNelisiwe Sibiya ubekumaciko abenandisa emcimbini kaZamokwakhe "King Bhaka" Nzama wokulanda amandla nensebenzo yokubethela obuse-44 Rocky Ridge, eHillary ngoMgqibelo. UNelisiwe obeqashelwe ukuphatha uhlelo uphinde wacula kwachwaza. Abantu abebechazwe wukubona umlingisi bezitshela ukuthi uzobingelela ubageze igilo evele eqhulula nezingoma ecula.
Ngesikhathi kukhangiswa ngomcimbi ubengaveziwe kwiPoster abantu bachazwa ukumbona kade bengalindele.
Uphinde wabambisana noMthunzi Xulu ngokuphatha uhlelo. Abanye bazokhumbula ukuthi uNelisiwe akalona ivukana emculweni njengoba izingoma ezazidlalwa emdlalweni wethelevishini iLockdown kaMandla N, ziculwa uyena. IBlack Brain kaMandla N, yaze yenza nomcimbi wokwethula i-albhamu yezingoma zakhe owawuseThekwini eminyakeni edlule.
Umculi kamaskandi okubonakale kunyuka izinga lakhe lokunandisa, uLagxabha. Lo mculi uke waba sematheni ngengoma iKancane, ekhala ngoNgizwe Mchunu. Abantu baze bacela impinda kuyena. Indlela anandise ngayo kuze kwabuya nabese bezihlalele kude benganakile, befuna ukumbona. Abanye abaculi abanandise kulo mcimbi ngoBahubhe, Ithwasa Lekhansela noNkosi Nhlumayo.
Umuzi kaKing Bhaka kucacile ukuthi ukulungele ukusingatha noma iluphi uhlobo lomcimbi njengoba bekungenwa ngokuthenga amathikithi kodwa kwagcwala kwanyinyitheka.