UHAMBA phambili ngokuqokwa umlingisi uNombulelo Mhlongo, emcimbini wezindondo waphesheya kwezilwandle, iZikomo Africa Awards.
Umcimbi wezindondo wamazwe ahlukene uhlelwa minyaka yonke futhi kuhlonishwa amaciko emikhakheni ehlukene okubalwa umculo, ezokulinmgisa, ezemfashini, ezamabhizinisi nokunye. Nonyaka umcimbi iZikomo Africa Awards uzokuba ngoNovemba 18, eThe New Mulungushi International Conference Centre, eLusaka, eZambia.
UNombulelo (31) wasoPhongolo, odume esalingisa kwiDurban Gen, noZalo kuqokwe eminxeni emine. Le ntokazi esibuya kwiSkeem Saam nakwiFalakhe, iqhathwe kwiBest Supporting Actress noMakaila Mathys, Khosi Ngema, noChairmaine Mtinta bakuleli.
Emkhakheni weBest Actress Southern Africa, uNombulelo udlana imilala no-Ama Qamata, Thabsile Zikhali, Rosemary Zimu noNgelera Ramulondi bakuleli. KoweBest Actress in Africa, uNombulelo utholene phezulu noThando Thabethe, Ziya Xulu noNgelera Ramulondi nakoweMost Inspirational Woman.
Ephawula ngokuqokwa kwakhe uNombulelo uthe, kumethusile ngesikhathi abagqugquzeli bemthinta, bemazisa ngokuthi uqokwe kulo mqhudelwano obungaza amaciko. Uthe yize ikhono labo lituswa kuleli kodwa kuyinto enhle nokubungazwa nasemazweni angaphandle.
UThabsile, ozakhele udumo ngokulingisa kuZalo nakwiThe Queen, uthe sekuyihlandla lesikhombisa eqokwa emiqhudelwaneni yangaphandle njengoba esanda kuhlabana ngeBest Actress kumaShining Star Africa Awards.
“Kuyisibusiso ngokubungazwa ngekhono lami ngenxa yokusebenza ngokuzikhandla ngaphandle kwasekhaya. Nomakanjani kuwukuphumelela kweminye yemithandazo yami,” kusho uThabsile oqokwe emkhakheni weBest Actress Southern African, Best Supporting Actress nakoweBest Dressed Celebrity.
UDJ Hlo, owaqopha umlando ngokuba wuDJ wokuqala wesifazane ukuhlukanisa unyaka kuKhozi FM, uthe uqokwe kwiBest Club DJ. Unxuse abalandeli bakhe baqhubeke lapho begcine khona njengoba esanda kuhlabana ngomklomelo ofanayo kumaShining Star Africa Awards.
“Kunengoma engibenzele yona esiqalile ukususa umsindo ezinkundleni zokuxhumana esihloko sithi, Ubuhle Bakho. Abantu sebeqalile ukuyithakasela yize ingakaphumi,” kusho uDJ Hlo omele iNingizimu Afrika nozakwabo uDJ Michel.
Umculi mculi wekwaito uDr Malinga umele elakuleli kwiBest Traditional Artist. Umculi waseMnambithi, uCici Thwala, uqokwe ngengoma ethi Hamba Juba, noPaige ngethi Ghanama kumunxa weBest Popular Song. UCici ubuye waqokwa esigabeni seBest Artist.
ULungelo Mpangase, olingisa indawo eqavile kuNikiwe, uqokwe kwiBest Upcoming Actor. UThapelo Mokoena, uLuthuli Dlamini, Thabang Molaba noSenzokuhle badudulana kwiBest Actor. Amawele akwaQwabe, KwaDukuza, uVirginia noViggy, aqokwe kwiBest Duo/Group.
