USEKHIPHE umehlokaboni ngokushesha uDJ Tira emuva kokulahlekelwa okhiye bonyanyavu lwemoto ngempelasonto. UDJ Tira usekhiphe isamba sika-R5000 ukuhlomulisa umshayeli we-Uber owayemqashe ukuthi amuse esikhumulweni sezindiza i-OR Tambo ngoMgqibelo nokuyilapho esola ukuthi ukhiye weMercedes G Wagon waqathaka khona.
"Ngicela umshayeli owangisa e-OR Tambo angibuyisele ukhiye wemoto yami, ngizomnika u-R5000. Kade ngizama ukubika kwi-app, hhayi kuyabheda ngisizeni bo," kubalisa uDJ Tira ekhasini lakhe likaFacebook.
Iningi labantu seliqalile ukusabalalisa lesi sicelo nokumfunisa umshayeli ongaba nolwazi, yize abanye sebekwenza ihlaya bethi akanyuse umehlokaboni.
"Uxolo malume ngalokhu, sengathi ungawuthola ngoba kuyabiza ukwenza omusha," kusho uNomcebo Zikode.
"Ngicela ninike umalume ukhiye wakhe mahhala futhi uyanibhengisa lo muntu," ecelelwa uNgcebo Makhoba.
"Buyela kwi-app ye-Uber ubheke izindlela oke wazithatha uzothinta yena ngqo umshayeli," kuyala uRonnie Chizzy.