OZAKHELE udumo ngokulingisa kwiMbewu The Seed, uPortia Ncwane , akakholwanga ehlabana kuma-12th African Emerging Filmmakers Awards (AEFA). UPortia udle umhlanganiso emunxeni we-Best Documentary ngeqophamlando elisihloko sithi Igidangoma.
“Ngiswele amazwi, ngivele ngimsabe uNkulunkulu nezenzo zakhe ngoba ukhombise ukuthi uyayazi into asuke ehlose ukuyenza.”
Uthe ujabulele ukuthi izifiso zakhe ngengoma nokugcina isintu kufezekile.
“Nanokuthi abantu abangamagidangoma, sekuzokwaziswa kabanzi ngabo. Abantu abazinike isikhathi ngokwazi kabanzi ngengoma yaKwaZulu-Natal nokuhlukana kwayo.”
Echaza ngokuhlabana kwakhe, uthe uthuke ucilo uzishaya endukwini ngoba ubengalindele ngempela ukuthi uzohlomula ngalo mdlalo ekubeni besanda kuwukhipha. Ubonge kakhulu ukusebenzisana nozakwabo okuyiNyachengos Films, Embo Films noTalent Dube.
“Ukuthola kwethu le ndondo kusho ukuthi imisebenzi iyabonakala futhi ayiqhubeke, sizijwayeze ukusebenzisana siyindlu emnyama, singabukelani phansi.”
Ephetha uPortia uthe basezinhlelweni zokwenza isiqephu sesibili i-Tales of a Zulu Folk Dancer/Igida Ngoma.
“Siphinde futhi sithathe le filimu ikhonjiswe ezindaweni ezehlukene nasemphakathini,” kusho uPortia.
Umsunguli walo mqhudelwano wezindondo, u-Andile Buwa, uthe inhlosongqangi nge-AEFA ukuhlonipha nokugqugquzela ikhono labantu bakuleli kulo mkakha. Uhlelo lomcimbi beluphethwe wusaziwayo wodumo kwi-Real Housewives of Durban, uNonknyiso “Laconco”’ Conco.
Kulo mqhudelwano kubuye kwachonywa uphaphe lwegwalagwala izingwazi kulo munxa okubalwa kuzo umlingisi uJet Novuka, Mandla Ka Nozulu wodumo kuMkhokha, umdidiyeli wemidlalo yeshashalazi u- Edmund Mhlongo nomlingisi woZalo ne-Family Bonds uThabo Mnguni.
Abanye abanqobile yilaba: • Best Feature Film: Axiomatic, Best Supporting Actress: Baby Cele - Ukhumbuzile, Best Supporting Actor: Jimmy Magubane-Amalootist, Best Actress :Marie Swanepoel – Axiomatic, Best Actor: Mthobisi Khanyile - Amalootist, Best Film in Vernacular: Ingoduso Yami ,Best Director-Lungelo Ngcobo- Cash in transit neBest Short Film-Abalele.
