ULOKHU egxekwe esolwa ngokungabi nalo iqiniso u-DJ Sbu osebenze iminyaka nesihlabani somculi wakuleli esingasekho emhlabeni, uZahara. U-DJ Sbu babodwa abambeka amabala, bemsola ngokuthi ubenganendaba noZahara futhi wamenzela phansi esaphila.
Lokhu kulandela nesenzo sakhe sakamuva efaka izinhlelo zenkonzo yesikhumbuzo kaZahara ezoba seRhema Bible Church kusasa, kusukela ngo-11 ekuseni.
Uzibizele iziqandu njengoba iningi labantu belilokhu lishaya amakhala, limgxeka futhi limsongela ngokuthi ngelinye ilanga komele aphendule ngokweqiniso ngokwenzeka phakathi kwakhe noZahara.
"Linini kanti usuku lokwehlulela, noma solinda uNkulunkulu azibambele," kusho uNr Shandisi.
"Ngeke kukhohleke emlandweni okwenze kuye. Ngiyamkholwa," kusho uKatlego Rasebitse.
"Yeka ukwenza sengathi ubunendaba ngoba wehlulekile esaphila," kusho uMatthews Moloto.
"Hha! unesibindi bhuti wabantu," kusho uSinentokozo Bucs Glam Ngobese.
"Cha, bhuti bengiwumlandeli wakho omkhulu kuze kube ngelinye ilanga ngibona iqophamlando ngowakwenza kuye," kusho uBhuti Troy.
Yize sebekusho konke abantu kodwa bakhona nabazwelana naye u-DJ Sbu ngalezi zinsolo. Abanye bosaziwayo balokhu bebhale imiyalezo enothando neduduza umndeni kaZahara.
U-DJ Sbu yize le mibono igcwele emakhasini akhe ezinkundleni zokuxhumana kodwa kubukeka sengathi uyishayi indiva njengoba engazikhathazi ngokuyiphendula.