IZIKHULU zomsakazo iGagasi FM, zithi sezikulindele ngabomvu ukwamukela abalandeli babo abazoba yingxenye yomcimbi wabo waminyaka yonke iThe Gagasi FM Beach Fest.
Umcimbi walo nyaka nozobe ubanjwa okweshumi uzobanjelwa endaweni engajwayelekile ukusentshenziwa ilo msakazo njengoba uzobanjelwa eMoses Mabhida People’s Park.
UPinky Myeni weGagasi uveze ukuthi bayathemba ukuthi abantu bazoyijabulela indawo abazokwenzela kuyo lo mcimbi.
“Kuyaqala ukuthi lo mcimbi wenzelwe endaweni engasondelene nolwandle. Lesi sinqumo sisithathe ngoba sifuna ukhule kakhulu ngakho besidinga indawo evulekile. Sijabule kakhulu ngokuthi kuthe nje sekusele amasonto amabili ubanjwe, amathikithi aphela nokukhombisa ukuthi iningi injabulo nobumnandi esibenzele abantu ngalo mcimbi ngakho njalo uma siwenza abantu bafuna ukuba yingxenye yawo,” kusho uPinky.
Uthe kuzoba khona abaculi okubalwa kubo iTKZee, Nasty C, Maphorisa, Tyler ICU, Dlala Thukzin, Blaq Diamond, Nomfundo Mo, Khaya Mthethwa, Bello no Gallo, K.O nabanye.
Uveze ukuthi uhlelo lwalo mcimbi luyobe luphethwe abasakazi okukhona kubo uFelix Hlophe, Penny Ntuli, Minnie Ntuli, Heazy, Zisto, Khaya Dladla noHope Mbhele.
Uthe amasango ayovulwa ngo-10 ekuseni umcimbi bese uqala kuze kube u-10 ebusuku.