UMKHANKASO ovumbulule amakhono abesifazane abebesakaza emisakazweni yomphakathi iWinnie Mahlangu Presenter Search uzobanjwa okokugcina kulo nyaka emsakazweni Ukhozi FM.
Lokhu kuvezwe abaphathi balo msakazo ngesikhathi bekhipha isimemezelo sokuthi umkhankaso walo nyaka usuvuliwe.
Kuwo kuhlabane abasakazi okubalwa kubo uZama Mseleku owadla umhlanganiso ngo 2020, walandelwa uBingelela Mpanza, uLonda Mbatha noNozipho Zulu odume ngelikaMaZul’ ozulayo.
Ekhasini lomsakazo Ukhozi abaphathi balo babonge abalaleli ngokubaxhasa kule minyaka emine umkhankaso uqalile.
“SiwuKhozi FM sibonga kubo bonke abalaleli ngokubeka umkhankaso wokuhlonipha iqhawekazi kwezokusakaza uWinnie Mahlangu kuleli zinga ofike kulo kusukela ngo 2020 kuze kufike emaphethelweni, njengoba ugoqwa kulo nyaka. Njengoba sesiwuvala umkhankaso, simema abesifazane emkhakheni wokusakaza abanekhono lokusakaza ngolimi lwesiZulu, abanolwazi lokusakaza izinhlelo ezehlukene ukuthi bazame inhlanhla,” kuchaza uSbongi Ngcobo ongumphathi kulo msakazo.
Uthe abafuna ukungenela bangathumela idemo yabo besakaza ngolimi lwesiZulu idemo yabo ingeqi emizuzwini emibili.
“Abangenele bangathumela nge-email [email protected]. Ukwamukela amademo kuzovalwa ngoJulayi 26 ebusuku. Sizohlunga abazolandela imigomo., Sithanda ukukuqinisekisa ukuthi umkhankaso uvuleleke kwabesifazane kuphela,” kuchaza yena.