ISANGOMA sodumo kwiTV, uMakgotso "Gogo Maweni" Mofokeng (Mokopo) usazobhadla esitokisini kuze kushaye uMsombuluko, okuwusuku azobe efaka ngalo isicelo sebheyili. Lo melaphi wendabuko ubevele eNkantolo yeMantshi yaseProtea, namhlanje, emuva kokuboshwa ngeSonto ngezithuba zabo-3 ntambama.
UMaweni usolwa ngokushaya ngenhloso yokulimaza, okuyicala elenzeka ngo-2019.
Isolezwe lithole ukuthi uGogo Maweni uboshwe ngamaphoyisa angamalungu eGauteng Province Cold Case Investigation Unit naweGauteng Counter Intelligence Investigation asesiteshini saseMondeor, eGoli, ngezinsolo ezibandakanya ukushaya ngenhloso yokulimaza, okuyisigameko esenzeka ngo-2019.
Leli phephandaba libuye lathola ukuthi uMaweni uyathinteka nasezigamekweni zokubulawa kwabantu ezenzeka e-Eldorado Park, eMondeor, e-Orange Farm naseBekkersdal phakathi kuka-2020 no-2024, okungamacala asaphenywa.
Lezi zinsolo ziqale ukudalulwa wuzakwabo oyimbangi yakhe enkulu, uPatricia "Gogo Skhotheni" Motsoeneng, engxabanweni yabo eyayishisa phansi kwiTikTok. USkhotheni waze waveza nokuthi phakathi kwabanye abantu ababulawa kubalwa nomyeni wobengumngani wakhe omkhulu. USkhotheni wathi lezi zindaba uMaweni waziphahluka kumalungu omndeni wakhe ngesikhathi eseqiwe yizinkamba zikaFaro, kanti umfowabo ubesehamba ecula ngalezi zehlakalo.
Nakuba kunjalo, ngesonto eledlule uSkhotheni noMaweni baveze ukuthi sebekhumelene umlotha. Baze baxabane nje, ngo-2023 uSkhotheni nguye owaveza ukuthi uMaweni ukopela izitayela zakhe kanye nensipho yakhe.
UMaweni uqale ukuzakhela udumo emuva kokuvela kwezindaba zokuthi ubethandana nowangumlingisi weThe Queen, uSthembiso "SK" Khoza enguShaka nowayengumdlali weMamelodi Sundowns, uSiyabonga Zulu.