BAHLUKENE phakathi ababukeli bomdlalo owuchungechunge obusakazwa kwiSABC 2 uMuvhango, ngemva kwezindaba zokuthi ufinyelele emaphetheni ngoLwesibili.
Kushaqeke abantu abaningi ngesikhathi bethola ukuthi uMuvhango bewugcina ngesiqephu sika-130 seSizini 25 ngo-9 ebusuku.
Emuva kokuphela kwalesi siqephu, aboMuvhango babhale ukuthi "Kuphelile ngoMuvhango, siyabonga ngokubukela kuyo yonke le minyaka."
Yize iningi likhathazekile ngokuphela kwawo kodwa kwabanye igcagcele esokeni ngoba bathi umdalo bese usunesicefe. Umdlalo obulingiswa ngolimi lwesiVenda, waqala ukusakazwa kulesi siteshi ngo-Ephreli 1997, kusasakazwa isiqephu esisodwa ngesonto ngaphambi kokuba izinsuku zikhuphuke zibe nhlanu.
UMuvhango ikhiqize abalingisi abanjengoGabriel Temudzani, Dingaan Khumalo, Lindiwe Cibi noMcDonald Ndou.
Kuthiwa bekuwumdlalo obukwa kakhulu ngoba bewunababukeli abawu-1 292 635 ngoMeyi.
Lo mdlalo ulandela ezithendeni ze-7de Laan, Rhythm City, Isibaya, Isidingo, DiepCity neminye.