SESIZOKWAZI ukusabalalisa umculo waso nakwamanye amazwe isihlabani somculo kamaskandi esesiyibambe iminyaka.
IHhash’ Elimhlophe livumbuke nge-albhamu entsha ka-29 ethi Amawazawaza enezingoma eziwu-16 ayikhiphe ngaphansi kwesitebele somculo i-Universal Music.
UBheki Ngcobo odume ngeleHhash’ Elimhlophe utshele leli phephandaba ukuthi yize esezakhele nabalandeli emazweni amaningi aphesheya kodwa umculo wakhe uyindlala kula mazwe. IHhash’ Elimhlophe elaqala ukukhipha izingoma ngo-1985, lithe ukujoyina i-Universal Music kube ngesinye sezinqumo elibona ukuthi bese kuyisikhathi sokuthi asithathe ukuqinisekisa ukuthi umculo wakhe utholakala emhlabeni wonke.
“Kuningi osekwenziwa manje ukusabalalisa umculo kubantu, le albhamu izotholakala nakuma-downloads okuyinto yesimanje. Ngiyajabula nokuthi umculo wami sewuzofika kalula ezitolo zakwamanye amazwe. Ngikhumbula nje ngise-India naseChina, abantu bakhona babengibuza izitolo abangawuthenga kuzo umculo wami kodwa ungekho. Umculo wesintu usegazini kuthina esiwuculayo kodwa ngoba uhamba nomyalezo, nabantu bakwamanye amazwe bayafunda kuwona futhi bayawuthanda, yingakho kumele sizame ukuthi bawuthole,” kusho iHhash’ Elimhlophe.
Liqhuba liveze ukuthi le albhamu belilokhu lizihlanganisela yona ekhaya ngokubambisana nomndeni walo kusukela nyakenye.
“Bese ngineminyaka emibili ngingakhiphi albhamu, vele angiyena umuntu ojaha ukukhipha njalo ngoba ngisuke ngifuna ukudlulisa umyalezo ngomculo. Kulokhu ngikhuluma ngothando nezimo eziningi abantu ababhekana nazo empilweni. Zikhona nezingoma ezimnandi zokujabula,” kusho iHhashi.
Lithe ukusebenza ngokubambisana nomndeni walo ikakhulu izingane nonkosikazi walo, uLinah Ngcobo yikho okulenza lakwazi ukuphuma nolozolo lwe-albhamu.
Ukuba seduze nomndeni walo lithe ngenye yezinto emenza abe yindoda emsabayo uNkulunkulu ngokubona nezinto ezinhle asebezizuze ndawonye njengomndeni.
Lithe maduze lizotheleka KwaZulu-Natal lihambele izindawo ezahlukene nemisakazo lizokwethula yona le i-albhamu kubantu. Amawazawaza aseqalile ukutholakala ezitolo kanjalo nakuma-downloads.