ISILOMO sikamaskandi uKhuzani “Indlamlenze” Mpungose sigqugquzele abantu ukuthi bathenge amathikithi omcimbi ongoMgqibelo.
UKhuzani uhlele i #GcwalisaiMabhida enkundleni iMoses Mabhida Stadium, eThekwini.
“Besingakabheki ukuthi kusele amangakanani. Ngiyabanxusa kodwa abantu ukuthi leli yithuba lokugcina ukuthi bathenge. Uma kushaya usuku lomcimbi egcina engaphelanga sizolenza icebo lokuthi atholakale esangweni. Senzela nabazothatha isinqumo sokuza ngomzuzu wokugcina,” kusho uKhuzani.
Amathikithi aqala kuR150 eComputicket. Phakathi kwabazobe benandisa kubalwa uBahubhe, Osaziwayo, Amangcukumane, Ihhashi Elimhlophe, Thokozani Langa, Amageza amahle, Phuzekhemisi, Jaiva Zimnike nabanye.
“Ngizobe ngicula bukhoma nebhendi. Kukhona abaculi engizocula ngokuhlanganyela nabo,” kusho uKhuzani.
Umcimbi uzoqala ngo-2 emini uphele entathakusa.
Kusuka kumenyezeliwe umcimbi, lo mculi uya ezindaweni ezahlukene ukuyonxenxa abantu ukuthi bathenge amathikithi.