KUZOBUNGAZWA ingwazi yeBafana Bafana, uDoctor Khumalo ngeqophamlando elizoveza impilo yayo kuMzansi Magic kusuka ngo-Okthoba 2.
Iqophamlando elithi 16V Doctor Khumalo: Untold, lizodlala izigaba ezine amasonto elandelana kusuka ngo-8 ebusuku.
Kuzobe kuvezwa ukusuka nokuhlala ngempilo ka-16V, okuyigama uDoctor aziwa ngalo, kusuka ekhula kuze kube uba yisilomo sebhola.
Umqondisi wezinhlelo zakuleli zeM-Net, uShirley Adonisi, uthe bajabule ngokwethula iqophamlando kuMzansi Magic.
“Udumo lukaDoctor Khumalo lungaphezu kwebhola. Wayeyingwazi futhi uyingwazi namanje. I-16V Doctor Khumalo: Untold, wumbungazo nendlela eyiqiniso eveza elinye lamaqhawe ethu asaphila. Siyisiteshi siyaziqhenya ngokuba nethuba lokuhlonipha elinye lamaqhawe esizwe lisaphila. Akulona iqophamlando ongafuna likuphuthe leli,” kusho uShirley.
Kwiqophamlando uDoctor uzophinde awuxoxe yena umlando wakhe, ozakwabo ayedlala nabo, ababengabadlali bebhola, osopolitiki, osaziwayo nabanye abazobe bechaza ngaye.
Kulindeleke ukuthi kuvele izigameko njengalapho iBafana Bafana inqoba i-African Cup of Nations ngo-1996, ukudlala kancane e-United States of America, ukukhula ngaphansi kobandlululo nokunye.
UDoctor uzobe engaqali ukusebenzisana neMzansi Magic njengoba ebe yingxenye yohlelo iSaturday Showdown. Kulolu hlelo obelwethulwa nguThato Moeng osomahlaya uSkhumba, uDoctor ubengomunye wabaholi bamaqembu noBontle Modiselle, Sicelo Buthelezi, Makhadzi noSis Tamara.
Kulona babedlala imidlalo eyahlukene namaqembu abawaholayo.