OSANDA kuhlabana ngomklomelo weHunk of the Year kumaFeather Awards, uThembinkosi “Zidane” Mthembu, uphungana nezintokazi esezimfuna ocansini ngenxa yendawo ayilingisa emdlalweni okhuza ibuya kwiShowmax. UThembinkosi, olingisa indawo kaBonga kwi-Adulting, uthi ixakile imiyalezo ayithola kubalandeli bakhe ezinkundleni zokuxhumana selokhu eqale ukuvela kulo mdlalo.
"Ngaphandle kokwenaba kakhulu, kunomuntu ongicela ukuba ngimenze zonke lezi zinto engizenza embhedeni nozakwethu besifazane esilingisa nabo," kusho uThembinkosi, maqede aphele yinsini.
Lo mdlalo uzokhuza ibuya esiwombeni sesibili sewugabe ngezibabuli ezintsha zabalingisi.
KuSeason 2, i-Adulting izobe igabe ngoGaisang K Noge obenguNaledi kwiThe Wife futhi onguMampho kwiHouse of Zwide, uThembi Seete obekwiGomora neZone 14, u-Obakeng Kgwedi obekwiGomora neKokota, uSamkelo Ndlovu obekwiRhythm City noNomalanga Shozi obekwiRhythm City.
Kwababuyayo kubalwa uNhlanhla Kunene obengu-Eric, uThabiso Rammusi obenguMpho, uLuthando BU Mthembu obenguVuyani, uLondeka Sishi obenguNkanyezi noLungile Duma obenguZithulele. UThembinkosi uthe bezwana kakhulu nabantu alingisa nabo kwi-Adulting.
"Ngesikhathi siqala ukusebenza kuSeason 2, saba nengxoxo efanayo nesaba nayo ngesikhathi sifika okokuqala kuSeason 1. Leyo ngxoxo imayelana nokuqinisekisa ukuthi sisebenza ngokuzikhandla kulo msebenzi. Yingane yethu le. Ngakho sizoyinikeza lonke uthando oluyifanele ukuze le Season ibe yimpumelelo. Siyinto eyodwa."
UThembinkosi uthe kule sizini babe nengcindezi enkulu ngoba bekufanele babhukule ukuze benze ubulungiswa kulo mdlalo. Uthe abantu bazobhema bakholwe ngenxa yendlela okuzobe kwenzeka ngayo.
"Ngijabule ngendawo engizoyidlala. Kuningi ababukeli abazokufunda ngoBonga njengoba eqala ukufunda kabanzi ngempilo."
I-Adulting Season 2 izoqala ukukhonjiswa kwiShowmax ngoDisemba 4, ngemiSombuluko kuze kushaye uFebhuwari 26, 2024.