“Ngiyohlale ngiligxumela ithuba lokuzithuthukisa noma yinini uma livela.”
Ngamazwi omethuli wezinhlelo zethelevishini kuleli uPenny Lebyane, emuva kokumenyezelwa njengomethuli omusha wohlelo olukhonjiswa kwiDStv BET Africa (ch 129) iThe Big Secret.
Lolu hlelo oluqale izolo ngo-7:30 ebusuku selibuya ngesizini yesithathu.
Exoxa neSolezwe ngeSonto uPenny, uthe uyazi ukuthi abantu baxakekile ukuthi useyashiya njalo ohlelweni abeqale ukulushayela emasizinini amabili edlule.
“Umuntu ongaziyo kahle uyazi ukuthi ngingumuntu onganqeni ukugxumagxuma inqobo uma kufezeka amaphupho ami. Futhi angiyena umuntu othanda ukubambelela entweni eyodwa ngoba ngiyayithanda into engikhulisayo,” kuchaza uPenny.
UPenny uthe uhlelo aluhlukile kakhulu kulezi ezinye izinhlelo abezishayela phambilini ngoba zonke zibhekelele inhlalonhle yabantu.
“Akuthina sonke esikwazi ukuyobona odokotela abaluleka ngengqondo, abanye badinga zona izinhlelo ezithinta izinto ezihlukumeza imindeni nezibahlupha emoyeni,” usho kanje.
Uthe kuyinjabulo ukuthi ekugcineni athole ithuba lokusebenzisana nalesi siteshi esikhulu sethelevishini ngoba kusho ukuthi umyalezo nosizo asuke efike nalo njengomethuli, luzofinyelela kwabaningi.
Yize uPenny eyintandokazi kwabanye kodwa khona abangayizwa indaba yakhe ikakhulu ezinkundleni zokuxhumana.
Muva nje, uzidonsele amanzi ngomsele ngesikhathi encoma umlingisi osezinze phesheya uThuso Mbedu, ethi kuyamsiza ukuthi akagxilile ezinkambeni zikaFaro yingakho ebukeka ena-21 ekubeni uneminyaka engu-31.
Kuwona futhi lo nyaka uPenny uziqhathe nozakwabo encoma ukusebenza kukaNgqongqoshe wezobuCiko namaSiko, uNathi Mthethwa, emuva kokuvela kwezindaba zefulegi likaR22 million.