UMLINGISI wakuleli obuye ethule izinhlelo zethelevishini nezemisakazo, uPearl Thusi, uthole ingqayizivele yethuba lokudlala emafilimini aseNigeria. Eyokuqala ithi Her Perfect Life, eyesibili ithi Iyawo Mi. Lezi zindaba zidalulwe nguPearl ekhasini lakhe le-Instagram.
Uthe imidlalo idingida kabanzi ngezifo zengqondo ezikhungethe abantu abaningi emhlabeni.
UPearl ubhale kanje: "I-Her Perfect Life ibheka izinselelo ezingagqamile zesifo sengqondo esibhekene no-Onajite Johnson Ibrahim, okungowesifazane ophila kamnandi eLagos. I-Iyawo Mi umdlalo odalula izingqinamba ezivamise ukukhungatha uthando, umshado nengqondo."
Eziphendulela umbhali nomqondisi wemidlalo u-Mo, ubonge kakhulu uPearl ngokubamba iqhaza emafilimini, wathi inhloso yawo ukuqwashisa ngezifo zengqondo.
"Njengoba usho, izifo zengqondo ziwudaba olungalokothwa emphakathini wethu. Ngakho yisikhathi esifanele sokuba sinake abantu ababhekene nale ngwadla. Isifo sengqondo asibandlululi ngokwamazinga empilo futhi sihlasela wonke umuntu. Ukusizwa ngabantu abanjengani (esho kuPearl), kungasiza ekuqedeni isinyama esihambisana nesifo sengqondo futhi sakhe isizwe esinakekelayo," kubhala uMo.
Phambilini uPearl uzakhele udumo emhlabeni ngokulingisa kwiQuantico ngo-2015, wadlala indawo eqavile emdlalweni wethelevishini, iQueen Sono.