UMLINGISI ozakhele udumo emdlalweni wethelevishini obusakazwa kuMzansi Magic Ifalakhe, ululeka ozakwabo besifazane ukuba bengasebenzisi ubuhle nobuntu babo ukuze bafakwe emidlalweni yethelevishini.
UNtokozo Ngcobo oteketiswa ngelethi Singqazu, ukhuthaza abesifazane ukuba bagxile ekuthuthukiseni amakhono abo kunokugxila ekuzenzeni bahle.
"Ubuhle bubodwa, imilenze emihle, izinqulu ezikhangayo nenanazi ngeke kwakuyisa ndawo," kugcizelela uNtokozo. Le ntokazi idalule ukuthi yaduba ukulingisa komunye umdlalo ngoba uphrojusa wakhona owayelingana noyise, efuna ukulala nayo emotweni.
Uthi le ndoda yavele yamphulula ithanga nebele. Uma eyibuza ukuthi yenzani, uthi yavele yathi angathukutheli ngoba izama ukumenzela umusa. Emuva kwalesi sigameko uNtokozo uthe washiya phansi kulowo mdlalo.
Uphinde wakhumbula esinye isigameko lapho aya kwinhlolokhono, wafike waphumelela kodwa uphrojusa wayilahla esefuna ukumkhipha. "Ngenqaba, kwaba wusuku lokugcina engezwa lutho ngaye nomdlalo." Ukhuluma kanjena nje uSingqazu, usanda kuthola amadlelo aluhlaza ngoba ngenyanga ezayo uzobonakala kwiDurban Gen. Ubelingisa indawo eqavile kaQueen Ibanathi kwiFalakhe, uthe uzobe edlala indawo yentombazane eyi-slay queen, uBuhle. Uthe ukulingisa le ndawo kumphonsele inselelo yokuba aveze elinye ikhono elingaziwa ngaye.
"Ingiyise emhlabeni ohlukile futhi yangifaka ntshi engqondweni ye-slay queen. Kudingeke ukuba ngenze ucwaningo olubanzi ngama-slay queen maqede ngaba nesiqiniseko sokuthi sengingakwazi ukugqokisa okwawo. Le ndawo ayigcinanga ngokuphonsela inselelo kodwa ibuye yanginikeza nenkululeko yokuba ngomunye umuntu ohluke kakhulu kimi, okuyinto engangikade ngiyilangazelele njengomlingisi,“ kuchaza uSingqazu.
Lo mlingidi ongusonkondlo, obuye abe ngumbhali wencwadi esihloko sithi Amaloba The Traces, uzakhele ugazi ngokulingisa indawo yeNdlovukazi uNandi, owayengunina weNkosi uShaka kaSenzangakhona.
UNtokozo uthe kumsizile ukulingisa emidlalweni yeshashalazi neyethelevishini ngoba kumthuthukisile futhi kwamcija ukuba akwazi ukuhlukanisa ishashalazi nethelevishini. Yize endlondlobala kule ndima yokulingisa kodwa uNtokozo uthi basathwele kanzima njengabalingisi besifazane.