UMLINGISI waseMatimatolo kodwa ogobe amadlangala eThekwini, uKhanyo Mngadi, uhlabane ngendondo yeBest Actress kumaLive Your Dream SA Youth Awards eStable Theatre, eThekwini, ngempelasonto.
UKhanyo (29) uqumbe phansi uZiningi Dlamini noZanele Gumede olale isithathu. Uthe ubeqokwe ngezindawo azilingisa efilimini ethi Anger nethi First Born.
UKhanyo uthe lo mklomelo usho lukhulu kuye ngoba umduduzile enhliziyweni.
“Lo nyaka ubunzima kakhulu kimina bandla, angifuni ukungasho kodwa le ndondo yenze kube khona okuhle engingasoze ngikukhohlwe impilo yami yonke ngo-2023.” Uthe yize esengumlingisi kodwa uqale ukwaziwa njengembongi.
"Abantu abaningi bawubonile umsebenzi wami njengembongi bawuthanda. Bawuzwa futhi nasemisakazweni, okuyilapho engahamba khona ngaya eGoli ngoba ngangizwe ukuthi amathuba okuphumelela khona maningi kodwa-ke ngibe sengibuya ngeza lapha eThekwini, ngibizwe ukuzoqopha amafilimu, ethi Anger, First Born namanye. Yilapho abantu abaqala khona ukubona ikhono lami lokulingisa, bangixhasa kakhulu kangangokuthi ngize ngaqokwa kuma-Live your Dream SA Youth Awards, ngase ngiwina indondo yeBest Actress."
UKhanyo ubonge kakhulu umdidiyeli wamafilimu alingise kuwo njengomlingisi oqavile.
"Ufike wabona ikhono elikhulu kimina nangendlela engizimisela ngayo ngomsebenzi wami, wase engiyisa kwenye i-agency ayithemba kakhulu, Imbumba Casting Agency, engikuyona njengamanje noma ngisanda kungena nje kuyona kodwa iyabonakala imisebenzi yayo. Ngingasho nje ukuthi ngonyaka ozayo kuningi okuzohamba kahle futhi nale ndondo ivele yanginika amandla," kuphetha uKhanyo.
Eminye imiphumela ihambe kanje:
Best Fashion Designer: Snakhokonke Fezokuhle, Best Radio Presenter: Mazwakhe Maphumulo, Best Local Film:Jozi Mafia, Best Upcoming Artist: UMagolide Angawakhe, Best Group: YVNG OGS, Best Poet: Sibonokuhle Triple S Zungu, Best DJ: DJ Speaker Music, Best Dancer: Gift August, Best TV Presenter: Lelita Velem, Best Actor: Thabiso R, Best Actress: Khanyo Mngadi, Best Comedian:Thlakudi Magoru, Best Photographer: Nqobani Qiniso Mncwango, Best Male Model: Maruapula, Best Female Model: Xolile, Hottest Look Award: Zekhethelo, Recognition Award: Mandisa Gasa ne-LYD Awards 2023 Ambassador: Umagolide Angawakhe.